اسلام آباد: پاکستان اسپورٹس بورڈ (پی ایس بی) نے پاکستان ہاکی فیڈریشن کے انتخابات آزاد الیکشن کمیشن کی نگرانی میں کرانے کا فیصلہ کر لیا ہے۔
قائمہ کمیٹی برائے بین الصوبائی رابطہ کی ہدایت پر پی ایس بی نے فیصلہ کیا ہے کہ پاکستان ہاکی فیڈریشن کے انتخابات از خود نہیں بلکہ آزاد الیکشن کمیشن کی نگرانی میں کرائے جائیں گے۔
انتخابات تین ممبران پر مشتمل الیکشن کمیشن کی نگرانی میں ہوں گے، جس میں چیئرمین اور دو ممبران پی ایس بی نامزد کریں گے جبکہ ایک ممبر پی ایچ ایف کی طرف سے ہوگا۔
مزید پڑھیں: وفاقی حکومت نے قومی ہاکی ٹیم کو پرو لیگ میں شرکت کی اجازت دے دی، 25 کروڑ کی فنڈنگ کا اعلان
پی ایس بی نے اعلان کیا کہ انتخابی عمل کی نگرانی کے لیے فیڈریشنز جیسے ایف آئی ایچ اور اے ایچ ایف سے بھی درخواست کی جائے گی۔
پی ایچ ایف کی جانب سے قائمہ کمیٹی کے سامنے جمع کرائی گئی کلبوں اور ایسوسی ایشنز کی فہرست کی جانچ پڑتال اسکروٹنی کمیٹی کرے گی۔
مزید پڑھیں: ہاکی ورلڈ کپ کوالیفائنگ راؤنڈ، پاکستان نے بنگلا دیش کو شکست دے دی
اسکروٹنی کمیٹی میں پی ایس بی، صوبائی ہاکی ایسوسی ایشنز اور صوبائی اسپورٹس بورڈ یا متعلقہ ڈسٹرکٹ اسپورٹس آفس کے نمائندے شامل ہوں گے، نوٹیفکیشن کے بعد کمیٹی اپنے کام کا شیڈول جاری کرے گی۔
پی ایس بی کے مطابق، ہاکی کلبوں اور ایسوسی ایشنز کی قانونی حیثیت جانچنے کے معیار کی منظوری صوبائی اسپورٹس بورڈز کے ساتھ مشاورت کے بعد کی جائے گی۔
یہ فیصلہ ہاکی کے شفاف اور آزادانہ انتخابات کو یقینی بنانے کے لیے کیا گیا ہے۔
