اسلام آباد: نئے مالی سال کے پہلے ماہ جولائی 2026 میں پاکستان کو 76 کروڑ 30 لاکھ ڈالرز کی غیر ملکی فنڈنگ موصول ہوئی جو جون کے مقابلے میں 81.13 فیصد کم ہے۔

وزارت اقتصادی امور کی جانب سے جاری رپورٹ کے مطابق جون 2026 میں پاکستان کو 4 ارب 4 کروڑ 31 لاکھ ڈالرز کی بیرونی فنڈنگ حاصل ہوئی تھی تاہم جولائی میں یہ رقم نمایاں طور پر کم ہوکر 76 کروڑ 30 لاکھ ڈالرز رہ گئی۔

رپورٹ میں بتایا گیا ہے کہ جولائی 2025 میں پاکستان کو 69 کروڑ 45 لاکھ ڈالرز کی غیر ملکی فنڈنگ ملی تھی جس کے مقابلے میں جولائی 2026 کی فنڈنگ میں 9.86 فیصد اضافہ ہوا۔

وزارت اقتصادی امور کا کہنا ہے کہ جولائی 2026 میں پاکستان نے 74 کروڑ 47 لاکھ ڈالرز کا غیر ملکی قرض حاصل کیا جب کہ گزشتہ ماہ ایک کروڑ 84 لاکھ ڈالرز کی گرانٹس بھی موصول ہوئیں۔

رپورٹ میں مزید بتایا گیا ہے کہ جولائی میں حاصل ہونے والی مجموعی بیرونی فنڈنگ میں غیر ملکی قرضے کا حصہ نمایاں رہا جب کہ گرانٹس کی مد میں موصول ہونے والی رقم مجموعی فنڈنگ کے مقابلے میں کم رہی۔