روم میں پاکستان اور اٹلی کے درمیان سفارتی تعلقات کو مزید مضبوط بنانے کے لیے ایک اہم معاہدہ طے پا گیا ہے جس کے تحت دونوں ممالک کے سفارتی پاسپورٹ رکھنے والے افراد کے لیے ویزا کی شرط ختم کر دی گئی ہے۔
پاکستان کے سفیر علی جاوید اور اٹلی کی وزارتِ خارجہ کے سیکریٹری جنرل ریکارڈو گوارِیلیا نے معاہدے پر دستخط کیے۔ یہ تقریب اٹلی کی وزارتِ خارجہ میں منعقد ہوئی جہاں دونوں فریقین نے رسمی طور پر معاہدے کا تبادلہ کیا۔
معاہدے کے مطابق اب پاکستان اور اٹلی کے سفارتی پاسپورٹ ہولڈرز بغیر ویزا کے ایک دوسرے کے ممالک کا سفر کر سکیں گے جس سے سفارتی روابط اور اعلیٰ سطحی روابط میں آسانی پیدا ہوگی۔
تقریب کے دوران دونوں رہنماؤں نے پاکستان اور اٹلی کے درمیان موجودہ دوطرفہ تعلقات، تزویراتی تعاون اور مختلف شعبوں میں جاری اشتراک پر اطمینان کا اظہار کیا اور اس بات پر زور دیا کہ یہ معاہدہ دونوں ممالک کے درمیان تعاون کو مزید وسعت دینے میں اہم کردار ادا کرے گا۔
سفارتی ذرائع کے مطابق یہ پیش رفت پاکستان اور اٹلی کے درمیان بڑھتے ہوئے اعتماد اور مضبوط ہوتے تعلقات کی عکاس ہے جو آئندہ برسوں میں مزید وسعت اختیار کرسکتے ہیں۔
