ایک عام خیال ہے کہ جنگلات کی آگ کا دھواں صرف پھیپھڑوں کو نقصان پہنچاتا ہے، تاہم حال ہی میں کی جانے والی ایک تحقیق سے یہ بات سامنے آئی ہے کہ یہ دل، دماغ، خون، حمل میں موجود بچے اور جسم کے دوسرے حصوں کو بھی متاثر کر سکتا ہے۔
دھوئیں میں بہت باریک اور نقصان دہ ذرات (پی ایم 2.5) اور دوسری زہریلی گیسیں ہوتی ہیں۔ یہ ذرات سانس کے ذریعے پھیپھڑوں میں داخل ہو کر خون تک پہنچ جاتے ہیں، جس سے جسم کے مختلف حصے متاثر ہوتے ہیں۔
ماہرین کے مطابق جنگلات کی آگ کا دھواں ہر سال دنیا بھر میں دسیوں ہزار لوگوں کی موت کا سبب بنتا ہے تحقیق سے معلوم ہوا ہے کہ جو لوگ لمبے عرصے تک اس دھوئیں میں رہتے ہیں، خاص طور پر بزرگ، ان میں فالج (اسٹروک) کا خطرہ بڑھ جاتا ہے۔
ماہرِ صحت یانگ لیو کا کہنا ہے کہ یہ دھواں صرف سانس لینے کا مسئلہ نہیں بلکہ پورے جسم پر اثر ڈالتا ہے اس سے جسم میں ایسی تبدیلیاں پیدا ہوتی ہیں جو مختلف بیماریوں کو بڑھا سکتی ہیں۔
اگر آگ کسی شہر یا آبادی تک پہنچ جائے تو دھواں اور بھی زیادہ خطرناک ہو جاتا ہے، کیونکہ اس میں صرف درخت ہی نہیں بلکہ پلاسٹک، دھاتیں اور دوسرے زہریلے مواد بھی جلتے ہیں۔
تحقیقات سے یہ بھی معلوم ہوا ہے کہ حمل کے دوران دھوئیں میں رہنے سے وقت سے پہلے بچے کی پیدائش یا کم وزن بچے کی پیدائش کا خطرہ بڑھ جاتا ہے۔
لمبے عرصے تک دھوئیں میں رہنے سے بعض اقسام کے کینسر اور دیگر دائمی بیماریوں کا خطرہ بھی بڑھ سکتا ہے۔
سائنس دانوں کا کہنا ہے کہ دھوئیں کی کوئی محفوظ مقدار ثابت نہیں ہوئی، یعنی کم مقدار میں بار بار دھواں بھی نقصان پہنچا سکتا ہے۔
امریکہ میں اس سال اب تک لاکھوں ایکڑ جنگلات جل چکے ہیں، اور ماہرین کا خیال ہے کہ اگر یہی صورتحال جاری رہی تو آئندہ برسوں میں لاکھوں اضافی اموات ہو سکتی ہیں۔
اگرچہ زیادہ تر لوگ دھوئیں سے نہیں مرتے، لیکن بہت سے افراد کو کھانسی، گلے میں درد، سینے میں جکڑن، سر درد، تھکن اور توجہ یا یادداشت میں کمی جیسے مسائل کا سامنا کرنا پڑتا ہے۔
خود کو کیسے محفوظ رکھیں؟
جہاں ممکن ہو صاف ہوا والی جگہ پر رہیں باہر نکلتے وقت اچھے معیار کا ماسک پہنیں۔گھر کی کھڑکیاں اور دروازے بند رکھیں تاکہ دھواں اندر نہ آئے۔اگر آپ کو دمہ، دل کی بیماری یا سانس کی تکلیف ہے تو غیر ضروری طور پر باہر جانے سے گریز کریں۔
مختصراً، جنگلات کی آگ کا دھواں صرف پھیپھڑوں ہی نہیں بلکہ پورے جسم کے لیے خطرناک ہے، اس لیے دھواں ہونے کی صورت میں احتیاط کرنا بہت ضروری ہے۔
