امریکی صدر ڈونلڈ ٹرمپ نے کہا ہے کہ ایران مذاکرات کا خواہشمند ہے، تاہم اب امریکا بات چیت میں دلچسپی نہیں رکھتا۔ ٹرمپ کا بیان لبنانی صدر جوزف عون سے وائٹ ہاؤس ملاقات کے بعد سامنے آیا، جس میں مشرق وسطیٰ کی صورتحال، حزب اللہ اور ایران سمیت اہم امور پر تبادلہ خیال کیا گیا۔
ملاقات کے بعد امریکی صدر ٹرمپ نے کہا کہ امریکا لبنان کی نمایاں مدد کرے گا اور دونوں ممالک کے درمیان اچھے دو طرفہ تعلقات موجود ہیں۔
ٹرمپ نے کہا کہ لبنان کے صدر جوزف عون مشرق وسطیٰ کے بہترین رہنماؤں میں شامل ہوسکتے ہیں، جبکہ لبنان میں حزب اللہ سمیت مختلف مسائل کے حل کے لیے اقدامات کیے جائیں گے۔
امریکی صدر نے ایران کے حوالے سے گفتگو کرتے ہوئے دعویٰ کیا کہ تہران امریکا کے ساتھ معاہدہ کرنا چاہتا ہے، تاہم اس وقت امریکا مذاکرات میں دلچسپی نہیں رکھتا۔
ٹرمپ کا کہنا تھا کہ ایران کو جوہری ہتھیار حاصل کرنے کی اجازت نہیں دی جائے گی، جبکہ انہوں نے ایران پر سخت دباؤ برقرار رکھنے کا بھی ذکر کیا۔
بحیرہ احمر کی صورتحال پر بات کرتے ہوئے امریکی صدر نے کہا کہ حوثیوں کو بحیرہ احمر کو بند کرنے کی اجازت نہیں دی جائے گی اور اگر ایسا کرنے کی کوشش کی گئی تو ضروری اقدامات کیے جائیں گے۔
ٹرمپ نے مزید کہا کہ امریکا خطے میں اپنے مفادات اور سلامتی کے تحفظ کے لیے اقدامات جاری رکھے گا، جبکہ لبنان کے ساتھ تعاون کو مزید مضبوط بنایا جائے گا۔
