ڈائریکٹرجنرل خیبرپختونخوافوڈ اتھارٹی سہیل خان نےعوامی شکایات پرمردان میں ملاوٹ مافیا کیخلاف بڑا کریک ڈاون کردیا۔

تفصیلات کےمطابق مردان کےعلاقے، پارہوتی، رستم ومتصلہ بازاروں میں فوڈ اتھارٹی نےبڑی کارروائیاں کرتے ہوئےصفائی کی ناقص صورتحال ، مضر صحت رنگوں کے استعمال پر چار بیکری یونٹس سیل کردیے۔

فوڈ اتھارٹی کی جانب سےجعلی مشروبات کی فیکٹری جڑسےاکھاڑ کرمشینری قبضے میں لےلی گئی جبکہ دس ہزار لیٹر مضر صحت مشروبات تلف بھی کر دیے گئے۔

فوڈاتھارٹی کی کارروائی کےدوران اسٹوریج ایس او پیز کی خلاف ورزی پر مشروبات ڈسٹریبیوشن یونٹ بھی سیل کردیا گیاجبکہ میگامارٹ سے 30 کلوگرام زائدالمعیاد خشک دودھ، کیچپ اور 20 کلو مس لیبل نمکو برآمد کرنے پر مارٹ سیل اوراشیاکوتلف کردیاگیا۔

اس کےعلاوہ فوڈ سیفٹی سٹینڈرڈز کی خلاف ورزی پر دو میگامارٹ اور چار بیکریوں کے لائسنس معطل کر دیے گئے۔ کارروائی کے دوران بارہ افراد کو پولیس کے حوالے کردیا گیا۔

ڈی جی فوڈاتھارٹی سہیل خان نے میڈیا سےگفتگو کرتے ہوئے کہا کہ کھانے پینےکی اشیا کا غیرمعیاری کاروبار کرنے والوں کیلئےخیبرپختونخوا میں کوئی جگہ نہیں، فوڈ اتھارٹی کی ٹیمیں عوامی دشمن، بے ضمیر ملاوٹ مافیا کی کوششوں کو ناکام بنانے میں مصروف عمل ہیں۔