پاکستان شوبز انڈسٹری کی سینئر اداکارہ میرا ایک انٹرویو کے دوران خود کو “سائیکو” قرار دیے جانے پر برہم ہو گئیں اور فنکاروں کے ساتھ احترام سے پیش آنے کی ضرورت پر زور دیا۔
سوشل میڈیا پر وائرل ہونے والی ایک ویڈیو میں دیکھا جا سکتا ہے کہ میزبان نے اداکارہ سے ان کی نئی فلم “سائیکو” کے حوالے سے سوال کرتے ہوئے تبصرہ کیا کہ پہلے بھی “سائیکو” تھیں، فلم میں ایسا ہی کردار ادا کیا اور اب تک اس کردار سے باہر نہیں آ سکیں۔
میزبان کے اس جملے پر میرا نے فوری ردعمل دیتے ہوئے اعتراض کیا اور کہا کہ فنکاروں کو ان کے اپنے ملک میں عزت ملنی چاہیے۔
انہوں نے کہا کہ اگر پاکستان میں فنکاروں کی حوصلہ افزائی نہیں کی جائے گی تو یہ افسوسناک بات ہوگی جبکہ دیگر ممالک میں بھی ہمارے کام کو سراہا جاتا ہے۔
View this post on Instagram
اداکارہ نے کہا کہ انہیں یہ تاثر دینا مناسب نہیں لگتا کہ وہ ذاتی طور پر بھی ویسی ہی ہیں جیسا کہ ان کے کردار کو پیش کیا جا رہا ہے۔ میں نے فلم میں ایک نہایت مشکل اور چیلنجنگ کردار ادا کیا ہے جس کے لیے بہت محنت کی گئی۔
میرا نے فلم کے ہدایت کار شان شاہد کا ذکر کرتے ہوئے کہا کہ پوری ٹیم نے ایک منفرد موضوع پر کام کیا ہے جس کی حوصلہ افزائی ہونی چاہیے۔
اداکارہ نے مزید کہا کہ فلم میں ڈپریشن جیسے سنجیدہ سماجی مسئلے کو اجاگر کرنے کی کوشش کی گئی ہے تاکہ عوام میں شعور پیدا ہو اور اس موضوع پر مثبت گفتگو کو فروغ ملے۔
