رمضان المبارک اپنی آمد پر رحمتوں و برکتوں کے علاوہ رونقیں بھی ساتھ لاتا ہے، ایسے میں روزہ داروں کی خوشی کو دوبالا کرنے کیلئے افطار میں لذیذ پکوان بھی خاص اہمیت رکھتے ہیں۔ جھٹ پٹ اور منٹوں میں تیار ہونے والے بریڈ رولز افطاری کیلئے خاص اہمیت رکھتے ہیں۔

بریڈ رول کی اس آسان ریسیپی سے اپنی افطاری کا مزہ دوبالا کریں۔

اجزاء

ڈبل روٹی کے سلائس —- چھ سے آٹھ عدد

بھرنے کا مصالحہ —– ایک پیالی

کوکنگ آئل —– تلنے کے لیے

بھرنے کا مصالحہ

1۔ آلو کا بھرتہ

آلو (ابال کر بھرتہ کیے ہوئے) —– دو عدد

نمک —– حسب ذائقہ

کالی مرچ (موٹی کٹی ہوئی) —— آدھا چائے کا چمچ

ہرا دھنیا (باریک کٹا ہوا) —- دو کھانے کے چمچ

پودینہ (باریک کٹا ہوا) —– ایک کھانے کا چمچ

ہری مرچیں (باریک کٹی ہوئی) —— ایک سے دو عدد

2۔ بھنا ہوا قیمہ

قیمہ —– 200 گرام

نمک —- حسب ذائقہ

ادرک لہسن پسا ہوا —– ایک چائے کا چمچ

لال مرچ پسی ہوئی —– آدھا چائے کا چمچ

ہلدی پسی ہوئی —— ایک چوتھائی چائے کا چمچ

ترکیب

ڈبل روٹی کے سلائس کو ایک ایک کر کے چار سے پانچ منٹ کے لیے پانی میں بھگو دیں۔

 ان دونوں ہاتھوں کے بیچ میں ایک ایک سلائس رکھ کر اچھی طرح دبا کر پانی کو ڈبل روٹی میں سے نچوڑ لیں۔

 آلو کا بھرتہ بنانے کے لیے تمام مصالحے آلو میں اچھی طرح ملا کر دس سے پندرہ منٹ کے لیے فریج میں رکھ دیں۔-

 بھنا ہوا قیمہ بنانے کے لیے قیمے میں تمام مصالحے ڈال کر درمیانی آنچ پر ڈھک کر اتنی دیر پکائیں کہ قیمے کا اپنا پانی خشک ہو جائے۔

 ڈبل روٹی کے سلائس کے درمیان میں ایک کھانے کا چمچ آلو کا بھرتہ یا بھنا ہوا قیمہ رکھ کر دبا دبا کر رول کی شکل میں بند کر لیں- پھر آدھا گھنٹہ فریج میں رکھ دیں۔

 کڑاہی میں درمیانی آنچ پر تین سے پانچ منٹ تک کوکنگ آئل کو گرم کر کے بریڈ رول گولڈن فرائی کر لیں۔