سوئس رول بچوں اور بڑوں میں یکساں طور پر پسند کیا جاتا ہے۔ رمضان المبارک میں افطاری کا مزہ دوبالا کرنے کیلئے اس آسان ریسیپی سے سوئس رول گھرمیں بنایا جاسکتا ہے۔

سوئس رول بنانے کیلئے یہ اجزاء درکار ہیں۔

میدہ ڈیڑھ پیالی۔

انڈے 4 عدد۔

چینی ایک پیالی۔

گھی یا آئل 4 کھانے کے چمچے۔

فلنگ کے لیئے۔فریش کریم 2 پیالی یا جیم ڈیڑھ پیالی۔

ترکیب

سب سے پہلے میدے کو 2 مرتبہ چھان لیں ، انڈوں کی سفیدی اور زردی کو الگ الگ پھینٹ لیں۔

چینی اور گھی کو ملا کر پھینٹیں پھر اس میں لکڑی کے چمچ کی مدد سے میدہ اور انڈے ملا لیں۔

اب اوون کو 180 سینٹی گریڈ پر 20 منٹ پہلے گرم کرلیں اور اس مکسچر کو بڑے سائز کی بیکنگ ٹرے میں ڈال کر ( تاکہ پتلی سی شیٹ کی شکل میں بنے ) 15 سے 20 منٹ کے لیئے بیک کرلیں۔

اوون سے نکال کر فوراً ہی براؤن پیپر پر پلٹ دیں اور کچھ دیر ٹھنڈا ہونے دیں۔

پھر حسبِ منشاء فریش کریم یا جیم اچھی طرح پھیلا کر لگائیں اور ٹائٹ رول کر لیں، پیپر میں رول ٹائٹ سے لپیٹ کر10 سے 15 منٹ کے لیئے فریج میں رکھ کر نکال لیں اور اب سلائس کاٹ لیں ۔

یہ سلائس فریزر میں رکھ کے مزید ٹھنڈی کرلیں اور مزے سے کھائیں۔