رہنما مسلم لیگ (ن) احسن اقبال کا کہنا ہے کہ موجودہ حکومت نے چلتے ہوئے اداروں کو مکمل طور پر تباہ کردیا ہے۔

اپنے جاری کردہ بیان میں ان کا کہنا تھا کہ پی ڈی ایم4 جولائی سےعوامی رابطہ مہم شروع کررہی ہے ، پیپلز پارٹی پی ڈی ایم کاحصہ نہیں ہے اور دعوت دینے کا سوال ہی پیدا نہیں ہوتا ہے۔

ان کا کہنا تھا کہ ن لیگ پرفرینڈلی اپوزیشن کا الزام لگانے والے پہلےاپنا گریبان دیکھیں ، ن لیگ کی طرح کسی جماعت کوسیاسی انتقام کا نشانہ نہیں بنایا گیا ہے۔

احسن اقبال کا مزید کہنا تھا کہ بلاول بھٹو کا بیان غیرسنجیدہ ہے،  بطورچیئرمین پی پی پی بلاول کواپنے بیان میں تحمل کی جھلک دکھانی چاہیے۔

انہوں نے بتایا کہ بجٹ اجلاس میں ن لیگ نےاپنا کردارادا کیا ہے ، ہماری وجہ سے حکومت نے 350 ارب کے ٹیکسز واپس لیے ہیں۔

حکومت عوام کا اعتماد کھو چکی ہے ،10 ضمنی الیکشن بھی ہارچکی ہے۔

احسن اقبال کا کہنا تھا کہ ملک میں مہنگائی اوربے روزگاری میں مزید اضافہ ہوگا، چیئرمین ایچ ای سی کوحکومتی کرپشن روکنے پرہٹایا گیا تھا کیونکہ وہ  کرپشن کےمنصوبوں میں رکاوٹ تھے۔

ان کا مزید کہنا تھا کہ  تاریخ میں پہلی  بار حکومت کوبجٹ میں یوٹرن لینا پڑا، حکومت نےاسمبلی میں اصل بجٹ پیش نہیں کیا ہے۔

حکومت کا اصل بجٹ آئی ایم ایف سے طےشدہ شرائط ہیں اور اب بجلی، پٹرول اورگیس کی قیمتوں میں مزید اضافہ ہوگا۔

بجٹ کے پاس ہونے کا دارومدارحکومت کی اکثریت پرہوتا ہے۔

واضح رہے کہ انہوں نے یہ بھی کہا کہ نارووال اسپورٹس کمپلیکس کوسیاسی انتقام کانشانہ بنایا گیا ہے ، عمران خان فکرنہ کریں اسکی جواب دہی آپ سے ہی ہوگی۔