عید قرباں اور عید کی تعطیلات کے دوران صفائی کے شاندار انتظامات میں بزدار حکومت بازی لے گئی ہے۔

تفصیلات کے مطابق عید قرباں اور عید کی تعطیلات کے دوران بہترین کارکردگی کا مظاہرہ کرنے والے افسران میں حسن کارکردگی سر ٹیفکیٹ تقسیم کرنے کی تقریب ہوئی ہے۔

وزیراعلی آفس میں منعقدہ تقریب کے مہمان خصوصی وزیراعلی پنجاب سردار عثمان بزدار تھے جبکہ انہوں نے عید قرباں پر صفائی مہم میں بہترین کارکردگی کا مظاہرہ کرنے والے افسروں کو تعریفی سر ٹیفکیٹ بھی دیے ہیں۔

ذرائع کا کہنا ہے کہ لاہور ویسٹ مینجمنٹ کمپنی پہلے، بہاولپور دوسرے اور سیالکوٹ تیسرے نمبر پر رہی ہے جبکہ بلدیاتی اداروں میں گجرات پہلے اور اوکاڑہ دوسرے نمبر پر ہے۔

تقریب کے موقع پر عثمان بزدار کا کہنا تھا کہ عیدالاضحی پر بروقت اوربہترین صفائی کے انتظامات پر سیاسی اور انتظامی ٹیم مبارکباد کی مستحق ہے جبکہ بہترین کارکردگی سے عوام کا اعتماد حاصل ہوتا ہے اور حکومت کو نیک نامی ملتی ہے۔

ان کا کہنا تھا کہ اچھی کارکردگی پر متعلقہ افسران کی حوصلہ افزائی ضروری ہے  جبکہ عید قرباں پر میری سیاسی اور انتظامی ٹیم نے کام کر کے دکھایا ہے اور تحسین بھی پائی ہے۔

عثمان بزدار کا مزید کہنا تھا کہ رواں برس عید قرباں پر آپ سب نے اپنی محنت سے عوام کے دل جیتے ہیں ، عوام کی خدمت میں سکون بھی ملتا ہے اور فرض کی ادائیگی بھی ہوتی ہے۔

 ان کا کہنا تھا کہ لاہور میں صوبائی وزراء اور انتظامی ٹیم نے دن رات محنت کر کے صفائی کے بہترین انتظامات کو یقینی بنایا ہے۔

واضح رہے کہ تقریب کے موقع پر لوکل گورنمنٹ اور کمیونٹی ڈویلپمنٹ کی ڈی جی کوثر خان ، پنجاب لوکل گورنمنٹ بورڈ کی سیکرٹری سائرہ عمر، گجرات ، اوکاڑہ اورسیالکوٹ کے ڈپٹی کمشنرز مہتاب وسیم اظہر، علی اعجاز اور طاہر فاروق سمیت دیگر افراد کو     سرٹیفکیٹس سے نوازہ گیا تھا۔