امریکی محکمہ خارجہ کے ترجمان نیڈ پرائس نے واشنگٹن میں پریس کانفرنس کرتے ہوئے کہا ہے کہ سیاسی حل ہی افغانستان میں امن کا راستہ ہے۔
پریس کانفرنس کے دوران ان کا کہنا تھا کہ ہم نے گزشتہ 20 سالوں کے دوران افغان عوام اور افغان حکومت کے ساتھ شراکت کی ہے ، افغانستان سے فوجی انخلا کے بعد شراکت داری کم نہیں ہوگی۔
نیڈ پرائس کا کہنا تھا کہ کابل میں ایک سفارتی احاطے کو برقرار رکھیں گےجبکہ انخلاء کے بعد بھی افغان عوام کے ساتھ شراکت داری جاری رہے گی۔
سفارت کاروں کی سیکورٹی کیلئے ضرورت کے مطابق امریکی فوجی موجود رہیں گے۔
ان کا کہنا تھا کہ دنیا کی سیکورٹی معاملات پر ہماری گہری نظر ہے ، افغانستان میں طالبان کی جانب سے جاری پرتشدد کارروائیاں بند ہونی چائیے۔
انہوں نے یہ بھی کہا کہ دنیا افغانستان میں زبردستی کی حکومت قبول نہیں کرے گی۔
پریس کانفرنس میں انہوں نے مزید کہا کہ افغان تنازعے کا کوئی فوجی حل نہیں ہے ، افغانستان کا معاملہ وراثت میں ملا ہے اور ہم افغان امن مصالحتی عمل کی حمایت کر رہے ہیں۔
انہوں نے بتایا کہ بندوق کے زور پر آنے والی حکومت کو عوامی حمایت حاصل نہیں ہوتی ، افغانستان میں بندوق کے زور پر حکومت کرنے والے عالمی حمایت حاصل نہیں کر پائیں گے۔
واضح رہے کہ انہوں نے یہ بھی کہا کہ ہم نے افغان مذاکرات میں معاون کا کردار ادا کیا ہے۔
مزید پڑھیں
Catch all the Business News, Breaking News Event and Latest News Updates on The BOL News
Download The BOL News App to get the Daily News Update & Live News