وزیر خارجہ مخدوم شاہ محمود قریشی کی منامہ میں بحرین کے وزیر داخلہ شیخ راشد بن عبداللہ الخلیفہ سے ملاقات ہوئی ہے۔

تفصیلات کے مطابق دوران ملاقات دو طرفہ تعلقات اور سیکورٹی و دفاعی شعبہ جات میں دو طرفہ تعاون کے فروغ سمیت باہمی دلچسپی کے امور پر تبادلہ خیال ہوا جبکہ بحرینی وزیر داخلہ نے وزیر خارجہ کو بحرین آمد پر خوش آمدید بھی کہا۔

شاہ محمود قریشی کا کہنا ہے کہ پاکستان اور بحرین کے مابین یکساں مذہبی ، ثقافتی اور تاریخی اقدار کی بنیاد پر استواراور گہرے برادرانہ مراسم ہیں جبکہ وزیر خارجہ نے کورونا وباء کے دوران بحرین حکومت کی جانب سے اٹھائے گئے اقدامات کو سراہا جن کی بدولت بحرین میں مقیم پاکستانی کمیونٹی کو کسی قسم تکلیف دہ صورت حال کا سامنا نہیں کرنا پڑا۔

وزیر خارجہ نے کورونا وباء کی مشکل گھڑی میں  وزارت داخلہ بحرین کی جانب سے ویزہ ایمنسٹی سکیم ، جرمانوں میں چھوٹ، ملزمان کی حوالگی اور وطن واپسی کے منتظر پاکستانیوں کی سہولت کے لیے کیے گئے اقدامات کی بھی تعریف کی جبکہ بحرینی وزیر داخلہ نے بحرین کی تعمیر و ترقی میں یہاں مقیم پاکستانی کمیونٹی کے مثبت کردار کی تعریف کی ہے۔

واضح رہے کہ بحرینی وزیر داخلہ نے وزیر خارجہ مخدوم شاہ محمود قریشی کا شکریہ ادا کرتے ہوئےپاکستان اور بحرین کے درمیان باہمی دلچسپی کے شعبوں میں تعاون بڑھانے کیلئے مشترکہ کوششیں بروئے کار لانے کا عندیہ دیا ہے۔