وفاقی وزیر اطلاعات فواد چوہدری کہتے ہیں کہ میڈیا کا منظر نامہ کافی حد تک وسعت اختیار کر چکا ہے۔

نیشنل ڈیفنس یونیورسٹی کی نیشنل میڈیا ورکشاپ کے شرکاء سے خطاب کرتے ہوئے فواد چوہدری کا کہنا تھا کہ آج ڈیجیٹل میڈیا کی ایڈورٹائزمنٹ 25 ارب روپے تک پہنچ گئی ہے جبکہ فیس بک اور گوگل نے پاکستان سے 7.5 ارب روپے کے اشتہارات کا بزنس کیا ہے۔

ان کا کہنا تھا کہ میڈیا میں ٹیکنالوجی کے خلل کی وجہ سے بعض جگہوں پر ملازمتیں ختم ہوئیں اور کچھ نئی ملازمتیں پیدا بھی ہوئی ہیں، ماضی میں جنگیں طاقت کے زور پر لڑی جاتی تھیں جبکہ اب رائے عامہ کی جنگ لڑی جاتی ہے۔

 فواد چوہدری نے کہا کہ دہشت گردی کے خلاف جنگ میں ہم نے 70 ہزار جانوں کی قربانیاں دیں لیکن آج تک اس پر کوئی کتاب نہیں لکھی گئی، ہمیں اپنا نکتہ نظر دنیا کے سامنے پیش کرنے اور میڈیا میں ترقی کے لیے ڈیجیٹل میڈیا پر توجہ دینا ہوگی۔

ان کا کہنا تھا کہ ملک میں موجود 42 جرنلزم اسکولز میں 1960 کا نصاب پڑھایا جا رہا ہے جبکہ بیرون دنیا میں لائٹس اور ساﺅنڈز میں لوگوں نے پی ایچ ڈی کر رکھی ہے، ہمارے پاس دور دور تک ایسے لوگ میسر ہی نہیں ہیں۔

انہوں نے بتایا کہ میڈیا کی ترقی کے لیے  پہلی مرتبہ میڈیا ٹیکنالوجی یونیورسٹی بنائی جا رہی ہے کیونکہ میڈیا ٹیکنالوجی یونیورسٹی میں اینی میشن، وژول افیکٹس ، فلم سازی، کیمرہ ورک سمیت میڈیا کے مختلف شعبوں کے بارے میں تعلیم دی جائے گی۔

وفاقی وزیر کا مزید کہنا تھا کہ میڈیا میں 1500 انٹرن شپس دی جائیں گی، پی ٹی وی کو ایچ ڈی اور ریڈیو کی نشریات انٹرنیٹ پر منتقل کر دی گئی ہیں جبکہ  کیبل آپریٹرز کے لیے بھی  ڈیجیٹل کیبل پالیسی منظوری کی گئی ہے۔

انہوں نے یہ بھی بتایا کہ کیبل آپریٹرز کو کامیاب جوان پروگرام کے تحت قرضے دیے جائیں گے تاکہ وہ اپنے صارفین کو ڈیجیٹل کیبل فراہم کر سکیں۔