وزیراعلیٰ پنجاب سردار عثمان بزدار کا کہنا ہے کہ شہدائے کربلا کی قربانیاں ہمارے لیے مشعل راہ ہیں۔

تفصیلات کے مطابق وزیراعلیٰ پنجاب سردار عثمان بزدار نے یوم عاشور کے موقع پر پیغام دتے ہوئے کہا ہے کہ امام حسینؓ اور ان کے جانثار ساتھیوں نے عظیم مقصد کیلئے اپنی جانوں کی قربانی دے کرتاریخ اسلام کا درخشاں باب رقم کیا ہے۔

 عثمان بزدار کا کہنا تھا کہ نواسہ رسول ؐ  نے جان دے دی لیکن باطل کے سامنے سر نہ جھکایا ، حضرت امام حسینؓ کی شہادت محض شہادت ہی نہیں تھی بلکہ سیرت النبیؐ کا ایک باب تھا-

ان کا کہنا تھا کہ تاریخ میں شہید زندہ رہتے ہیں، ظالم کا نام و نشان مٹ جاتا ہے ، حضرت امام حسینؓ اوران کے جانثاروں نے اپنی جانوں کا نذرانہ پیش کر کے باطل کے سامنے نہ جھکنے کا درس دیا ہے۔

عثمان بزدار کا مزید کہنا تھا کہ شہدائے کربلا کی عظیم قربانیوں نے دین اسلام کے آفاقی اصولوں، امن پسندی، صبر، برداشت اوراخلاقی اقدارکو قیامت تک کیلئے زندہ کردیا ہے۔

ان کا کہنا تھا کہ موجودہ حالات میں فلسفہ حسینؓ پر عمل پیرا ہونے کی پہلے سے کہیں زیادہ ضرورت ہے، ہمیں باہمی اتحاد اور ہم آہنگی کے ذریعے دشمن کے ناپاک عزائم کوخاک میں ملانا ہے۔

عثمان بزدار نے کہا کہ نواسہ رسولؐ نے اپنے کردار اورعمل سے حق کی آواز کو بلند کرنا اورانسانی اقدار کا تحفظ سکھایا ہے۔

ان کا کہنا تھا کہ حضرت امام حسین ؓکی جدوجہد ظلم کے خلاف سینہ سپر ہونے کا ابدی پیغام ہے ، یوم عاشور کے موقع پر ہمیں اپنی زندگیوں کو حقیقی معنوں میں حضرت امام حسینؓ کی روشن تعلیمات کے مطابق عمل پیرا ہونے کا  اعادہ کرنا ہے۔