پاکستان کے دورہ پر آئے عرب پارلیمانی وفد کی پارلیمنٹ کے صدر عادل بن عبدالرحمان کی قیادت میں وزارتِ خارجہ آمد ہوئی ہے۔

تفصیلات کے مطابق عرب پارلیمانی وفد کی وزارتِ خارجہ میں وزیر خارجہ شاہ محمود قریشی سے بھی ملاقات ہوئی جہاں وزیر خارجہ نے عرب پارلیمانی وفد کو پہلے دورہ پاکستان پر خوش آمدید کہا ہے۔

شاہ محمود قریشی کا کہنا ہے کہ پاکستانیوں کی ایک بڑی تعداد مشرقِ وسطیٰ میں قیام پذیر ہے جبکہ پاکستان کی عرب ممالک کے ساتھ گہری وابستگی ، یکساں مذہبی ، ثقافتی اور تاریخی اقدار کی بنیاد پر استوار ہے۔

ان کا کہنا ہے کہ پاکستان کے عرب پارلیمان کے رکن ممالک کے ساتھ بہترین دو طرفہ تعلقات ہیں جبکہ ہمارے مشرقِ وسطیٰ کے ممالک کے ساتھ گہرے دو طرفہ مراسم بھی ہیں۔

 وزیر خارجہ نے بتایا کہ او آئی سی کے بانی رکن ہونے کے ناطےہم اتحاد امہ میں مثبت کردار ادا کرنے کیلئے پر عزم ہیں،  جب میں مصر میں سرکاری دورہ پر تھا تو مجھے عرب لیگ ہیڈکوارٹر جانے، قیادت سے ملنے اور تبادلہ ء خیال کرنے کا موقع ملا تھا۔

انہوں نے بتایا کہ پاکستان تنازعات کے دیرپا سیاسی حل کیلئے مذاکرات کو واحد راستہ سمجھتا ہے جبکہ ہماری اقتصادی ترجیحات میں روابط کا فروغ، تعمیر و ترقی میں شراکت داری، معاشی و معاشرتی ارتقاءاور امن و استحکام کیلئے کاوشیں شامل ہیں۔

انہوں نے مزید بتایا کہ پاکستان ،  فلسطین اور کشمیر کے مسئلوں کا اقوام متحدہ سلامتی کونسل کی قراردادوں کی روشنی میں پرامن حل کا خواہاں ہے۔

واضح رہے کہ وزیر خارجہ نے عرب پارلیمانی وفد کو مقبوضہ جموں و کشمیر میں جاری انسانی حقوق کی سنگین خلاف ورزیوں اور بھارتی پالیسیوں کے باعث خطے کے امن  کو درپیش خطرات سے بھی آگاہ کیا ہے۔