اسپیکر پنجاب اسمبلی چودھری پرویز الٰہی کی وفاقی وزیر و چیئرمین این سی او سی اسد عمر سے ملاقات ہوئی ہے۔

 چودھری پرویز الٰہی کا کہنا تھا کہ آرمی چیف جنرل قمر جاوید باجوہ بدلتی ہوئی عالمی صورتحال سے پوری طرح آگاہ ہیں، پاکستان کی سلامتی کو پاک افواج کے ہوتے ہوئے کوئی خطرہ نہیں۔

ان کا کہنا تھا کہ ملک کو اس وقت سنگین خطرات کا سامنا ہے ، ملکی سلامتی کے دفاعی ادارے افغانستان کے حوالے سے اپنا مثبت کردار ادا کررہے ہیں۔

چودھری پرویزا لٰہی نے  بتایا کہ بلدیاتی نظام ایسا ہونا چاہیے جس کا فائدہ عام آدمی تک پہنچے، بلدیاتی نظام اتحادی پارٹیوں کے ساتھ مشاورت کے بعد بنایا جائے۔

انہوں نے مزید بتایا کہ کورونا ویکسین کی سپلائی اور مرض کو کنٹرول کرنے کے حوالے سے چیئرمین این سی او سی اسد عمر کے اقدامات قابل تعریف ہیں۔

ان کا کہنا تھا کہ ملک بھر میں ایس او پیز پر عمل نہ کرنے کی وجہ سے کورونا کے مریضوں میں اضافہ ہو رہا ہے۔

چودھری پرویز الٰہی نے مزید کہا کہ وبائی مرض کا مقابلہ کرنے کیلئے سب کو ایس او پیز پر عمل کرنا اور ویکسین لگانا ہو گی۔

واضح رہے کہ ملاقات میں وفاقی وزیر آبی وسائل مونس الٰہی، ایم این اے چودھری سالک حسین اور چودھری شافع حسین بھی موجود تھے۔