گلگت بلتستان میں زلزلے کے جھٹکے محسوس کیے گئے ہیں۔

زلزلہ پیما مرکز کے مطابق گلگت بلتستان کے گرد ونواح میں شدید زلزلے کے جھٹکے محسوس کیے گئے جبکہ ریکٹر اسکیل پر زلزلے کی شدت 5.2 ریکارڈ کی گئی۔

زلزلے کا مرکز اسکردو سے 90 کلو میٹر دور اور گہرائی 60 کلو میٹر ریکارڈ کی گئی ہے۔

یاد رہے کہ تاحال کسی بھی قسم کے جانی و مالی نقصان کی اطلاع موصول نہیں ہوئی۔

دوسری جانب ڈی جی ریسکیو کا کہنا ہے کہ کسی بھی  ناخوشگوار صورتحال سے نمٹنے کیلئے ریسکیو 1122 کی ٹیموں کو الرٹ رہنے کی ہدایات کی ہے۔

 ڈی جی ریسکیو کا کہنا ہے کہ تاحال کسی بھی قسم کے جانی و مالی نقصان کی اطلاع نہیں، تمام ضلعی انتظامیہ کو رابطے میں رہنے کی ہدایت کی ہے۔

زلزلے کیوں آتے ہیں اور اس کی وجہ کیا ہے؟ 

زلزلے قدرتی آفت ہیں جن سے ناقابل تلافی مالی و جانی نقصان ہوتا ہے، اب تک زلزلوں سے دنیا بھر میں لاکھوں افراد لقمہ اجل بن چکے ہیں۔

ماہرین کا کہنا ہے کہ زمین کی تہہ تین بڑی پلیٹوں سے بنی ہوئی ہے، پہلی تہہ کا نام یوریشین، دوسری بھارتی اور تیسری اریبین ہے۔

زیر زمین حرارت جمع ہوتی ہے تو یہ پلیٹس سرکتی ہیں، زمین ہلتی ہے اور یہی کیفیت زلزلہ کہلاتی ہے،زلزلے کی لہریں دائرے کی شکل میں چاروں جانب یلغار کرتی ہیں۔

زلزلے کے جھٹکوں سے زمین کی سطح پر موجود چیزوں کو نقصان پہنچتا ہے، عمارتیں اور دوسری تنصیبات گر جاتی ہیں، سڑکیں ٹوٹ پھوٹ جاتی ہیں، درخت اور بجلی کے پول زمین بوس ہو جاتے ہیں۔