شمالی وزیرستان میں پاک افغان بارڈر کے قریب فوجی قافلے پردہشت گردوں کے حملے میں 7 فوجی شہید ہوگئے جب کہ جوابی حملے میں 4 دہشت گرد بھی مارے گئے۔
پاک فوج کے شعبہ تعلقات عامہ (آئی ایس پی آر) کے مطابق شمالی وزیرستان میں پاک افغان بارڈرکے قریب دہشتگردوں کی جانب سے فوجی قافلے پر حملہ کیا گیا ، فوجی جوانوں نے بھی حملہ آوردہشت گردوں کوموثرجواب دیا۔
پاک فوج کی جوابی کارروائی میں 4 دہشت گرد ہلاک ہوگئے جب کہ دہشتگردوں کے حملے کے نتیجے میں 7 فوجی جوانوں نے جام شہادت نوش کیا۔
آئی ایس پی آر کے مطابق دہشت گردوں کے حملے میں شہید ہونے والوں میں فیصل آباد کے 36 سالہ حوالدار طارق یوسف ، سپاہی سلمان وقاص، سپاہی جنید علی، سپاہی اعجازحسین، سپاہی وقار احمد، سپاہی محمد جواد، سپاہی ارشد علی شامل ہیں۔
ترجمان پاک فوج کے مطابق فوجی قافلے پر حملہ شمالی وزیرستان کے علاقے ایشام میں کیا گیا جہاں دہشت گردوں کے خاتمے کے لیے کلیئرنس آپریشن جاری ہے۔
یہ بھی پڑھیں: شمالی وزیرستان میں دہشتگردوں سے فائرنگ کا تبادلہ، فوجی جوان شہید
آئی ایس پی آر کی جانب سے جاری بیان میں کہا گیا کہ پاک فوج دہشت گردی کی لعنت کو ختم کرنے کے لیے پرعزم ہے اور ہمارے بہادر جوانوں کی ایسی قربانیاں ہمارے عزم کو مزید مضبوط کرتی ہیں۔
دوسری جانب سابق وزیراعظم عمران خان نے ٹوئٹ کرتے ہوئے کہا کہ میں اپنے بہادر سپاہیوں کو سلام پیش کرتا ہوں، جوشمالی وزیرستان کے ضلع میں دہشت گردوں کے حملے سے لڑتے ہوئے شہید ہوئے ، ہمارے فوجی اپنے ملک کو دہشت گردوں سے محفوظ رکھنے کے لیے اپنی جانیں دے رہے ہیں اور ہماری پوری قوم ان بہادروں کے ساتھ کھڑی ہے۔
وزیراعلیٰ پنجاب عثمان بزدار نے شمالی وزیرستان میں فوجی قافلے پر دہشت گردوں کے حملے کی شدید مذمت کرتے ہوئے کہا کہ دہشت گردوں کے حملے ہمارے بلند حوصلوں کو پست نہیں کرسکتے ، ہماری تمام ہمدردیاں شہداء کے لواحقین کے ساتھ ہیں۔
قومی اسمبلی کے قائم مقام اسپیکر قاسم سوری نے ٹوئٹ کرتے ہوئے کہا کہ پاک افغان سرحد کے قریب دہشت گردوں کے پاک فوج کے قافلے پر حملے میں سات جوانوں کی شہادت پر نہایت افسردہ ہوں، پاک فوج کے جوان ہماری سرحدوں کے محافظ ہیں ان کی قربانیوں کو سلام پیش کرتا ہوں۔ اللہ تعالیٰ سے شہداء کے بلند درجات اور پسماندگان کے لیے صبرِ جمیل عطاء فرمانے کی دعا ہے۔
سابق صدر آصف علی زرداری نے پاک افغان سرحد پر فوج کے کافلے پر دہشت گردوں کے حملے کی مذمت کرتے ہوئے کہا کہ دہشتگردوں کی پناہ گاہیں تباہ اور منصوبہ سازوں کو کیفر کردار تک پہنچایا جائے، آخری دہشت گرد کو انجام تک پہنچانے تک آپریشن جاری رکھا جائے۔
واضح رہے دو روز قبل بھی شمالی وزیرستان کے ضلع ایشام میں فورسز اور دہشت گردوں کے درمیان فائرنگ کے تبادلے میں سپاہی عصمت اللہ خان شہید ہوگئے تھے۔
مزید پڑھیں
Catch all the Business News, Breaking News Event and Latest News Updates on The BOL News
Download The BOL News App to get the Daily News Update & Live News