نثار کھوڑو نے کہا ہے کہ عمران خان کو ملیر میں پی پی کے امیدوار نے 10 ہزار ووٹوں سے شکست دی۔

تفصیلات کے مطابق پیپلز پارٹی سندھ کے صدر نثار کھوڑو نے کورنگی جلسے سے خطاب کرتے ہوئے کہا کہ میں کہتا ہوں کہ ابھی تو پارٹی شروع ہوئی ہے، یہ پارٹی کبھی ختم نہیں ہوگی۔

نثار کھوڑو نے کہا کہ عمران تم کہتے تھے سندھ کو فتح کرونگا اور تم کو ہم نے ملیر میں ہی شکست دے دی، مجھے لگتا ہے عمران نے خود شکور شاد کو کہا ہوگا استفی واپس لو ورنہ الیکشن ہوتا تو لیاری سے بھی شکست کھاتا۔

پیپلز پارٹی سندھ کے صدر کا کہنا تھا کہ پی پی کو عمران نے تنگ کیا لیکن پی پی نے اس کی حکومت کا صفایا کردیا۔

ان کا یہ بھی کہنا تھا کہ بلاول بھٹو زرداری نے جب کراچی سے لانگ مارچ شروع کیا تو عمران کو استعفے کا کہا، ملکی تاریخ میں پہلی بار عمران خان واحد وزیراعظم ہے جس کو عدم اعتماد سے باہر نکالا۔

نثار کھوڑو نے کہا کہ پی پی کا لانگ مارچ پنڈی سے ہوکر اسلام آباد پہنچا تھا، بہٹو صاحب نے سمجھوتہ نہیں کیا تختہ دار پر چڑھ گئے، بینظیر بھٹو نے جان کی پرواہ نہ کرتے ملک واپس آئیں اور شہید ہوگئیں۔

ان کا کہنا تھا کہ عمران خان کو ملیر میں پی پی کے امیدوار نے 10 ہزار ووٹوں سے شکست دی، عمران خان محبت وطن نہیں ہے، عمران نے کہا اگر مجھے اقتدار سے نکالا تو بہتر ہے ہاکستان پر ایٹم بم گرادو۔

نثار کھوڑو کا یہ بھی کہنا تھا کہ عمران خان امریکی سازش سے یوٹرن لیا، سیلاب میں عمران خان سکھر میں کچھ دیر رکا اور بھاگ گیا۔

پیپلز پارٹی سندھ کے صدر نثار کھوڑو کا مزید کہنا تھا کہ پی پی اور دیگر جماعتوں میں فرق ہے، پیپلزپارٹی آگے بڑھنے کا نام ہے، نشتر پارک پی پی کے جلسے کے لئے چھوٹا پڑ جائے گا۔