میکسیکو کے سرحدی شہر کی جیل پر مسلح افراد نے حملہ کیا جس کے نتیجے میں 14 افراد ہلاک ہو گئے ہیں۔

غیر ملکی میڈیا کے مطابق میکسیکو کے سرحدی شہر سیوڈاڈ جواریز کی جیل پر مسلح افراد کے حملے میں جیل کے دس محافظ سمیت چار قیدی ہلاک ہو گئے ہیں۔

 جبکہ 24 قیدی فرار ہونے میں کامیاب ہو گئے۔

ریاستی حکام کے مطابق مسلح افراد نے اپنے ساتھیوں کی رہائی کے لیے حملہ کیا تھا، جس میں وہ کامیاب ہوئے اور 24 قیدی فرار ہو گئے۔

میکسیکو کی چیہواہوا ریاست کے پراسیکیوٹر کے دفتر نے اپنے ایک بیان میں کہا کہ حملہ آور مقامی وقت کے مطابق صبح 7 بجے متعدد بکتر بند گاڑیوں میں جیل پہنچے۔

مقامی میڈیا نے رپورٹ کیا کہ جیل کے اندر بھی کچھ فسادی قیدیوں نے مختلف اشیاء کو آگ لگا دی اور جیل کے محافظوں سے جھڑپ کی۔

ریاستی پراسیکیوٹر کے دفتر نے کہا کہ میکسیکو کے فوجیوں اور ریاستی پولیس نے بعد میں جیل کا کنٹرول دوبارہ حاصل کر لیا۔

ریاستی پراسیکیوٹر نے بتایا کہ کم از کم چار افراد کو حراست میں لیا گیا، لیکن یہ بتانے سے گریز کیا کہ وہ قیدی تھے یا مسلح حملہ آور تھے۔

پراسیکیوٹر کے مطابق اس بارے میں تفصیلات دستیاب نہیں ہیں کہ فرار ہونے والے 24 قیدی کیسے فرار ہونے میں کامیاب ہوئے، اور فوری طور پر یہ واضح نہیں ہو سکا کہ حملہ کس نے کیا۔

ریاستی پراسیکیوٹر کے دفتر نے کہا کہ اس کے اہلکاروں نے تحقیقات کا آغاز کر دیا ہے۔

واضح رہے کہ میکسیکو کی جیلوں میں تشدد کثرت سے ہوتا ہے، جن میں کچھ ایسے بھی ہیں جہاں حکام صرف برائے نام کنٹرول رکھتے ہیں۔

میکسیکو کی جیلوں میں حریف گروہوں کے قیدیوں میں جھڑپیں اب معمول بن چکی ہیں جو جیلوں میں منشیات کے گروپس کے لیے پراکسی کا کام کرتے ہیں۔

میکسیکو کا یہ سرحدی شہر سیوڈاڈ جواریز امریکہ کے سرحدی شہر ایل پاسو، ٹیکساس کے قریب واقع ہے۔