خواجہ آصف نے کہا کہ عام انتخابات اکتوبر میں ہی ہوں گے۔

تفصیلات کے مطابق وزیر دفاع خواجہ آصف نے اسلام آباد میں پریس کانفرنس کرتے ہوئے کہا کسی سیاسی ورکر کو یہ زیب نہیں دیتاکہ وہ بیرونی مدد کے لیے مہم چلائے، عمران خان نے غیر آئینی طور پر قومی اسمبلی توڑی، عمران خان کےخلاف تحریک عدم اعتماد آئینی طریقے سے لائی گئی۔

انہوں نے کہا کہ عمران خان نے تحریک عدم اعتماد کے بعد غیر قانونی اقدامات اٹھائے، حکومت کے خاتمے کے بعد ہر مقام پر غیر قانونی اقدام اٹھایا اور سپریم کورٹ نے مداخلت کر کے آئین کو بچایا۔

خواجہ آصف نے یہ بھی کہا کہ سائفر کے ذریعے عمران خان نے امریکی سازش کا بیانیہ بنایا، تحریک انصاف کا منفی رویہ سب کے سامنے ہے،عمران خان بضد ہے کہ عدالتوں کے سامنے پیش نہیں ہوگا۔

ان کا کہنا تھا کہ عمران خان اور اس کے کارکن عدالتوں کو تضحیک کانشانہ بنارہے ہیں، عمران خان جتھوں کولے کر عدالت  پہنچتا ہے، عام انتخابات اکتوبر میں ہی ہوں گے۔

خواجہ آصف کا یہ بھی کہنا تھا کہ نواز شریف نے لندن سے آکر اپنی بیٹی کے ساتھ گرفتاری دی، نواز شریف کو تین بار حکومت سے نکالا گیا، لیکن کبھی اس نے آئین اور قانون کی خلاف ورزی نہیں کی۔

وزیر دفاع خواجہ آصف کا مزید کہنا تھا کہ عمران خان نے چند ماہ قبل اپنی حکومت کےخلاف سازش کا الزام امریکا پر لگایا اوراب وہ لابنگ کروا کر امریکی عہدےداروں سے اپنے حق میں بیانات دلوا رہے ہیں۔