آسمان سے باتیں کرتی قیمتیں عام آدمی کی جیب پر بہت زیادہ بھاری پڑ رہی ہیں

کراچی

مہنگائی پر قابو پانے کے بلند بانگ دعوؤں کے ساتھ اقتدار میں آنے والی 13 جماعتی مخلوط حکومت عام آدمی کو کوئی ریلیف دینے میں ناکام رہی ہے۔ اپریل 2022ء میں سابق وزیر اعظم عمران خان کی معزولی کے بعد سے پاکستان سیاسی اور معاشی بحران کے بدترین دور میں پھنسا ہوا ہے۔

روزمرہ کی اشیاء کی قیمتیں آسمان کو چھو رہی ہیں، جو عام آدمی کی جیب بہت زیادہ بھاری پڑ رہی ہیں۔ مزید برآں، 2022ء کے مون سون کا سیلاب ایک اضافی بوجھ لایا جس نے افراط زر کے اثرات کو کئی گنا بڑھا دیا ہے۔

بین الاقوامی مالیاتی فنڈ (آئی ایم ایف) کے وفد سے اہم بات چیت کے دوران مہنگائی 48 سال کی بلند ترین سطح پر پہنچ گئی ہے۔ جنوری 2023ء میں سالانہ بنیاد پر مہنگائی 27 اعشاریہ 55 فیصد ریکارڈ کی گئی، جو مئی 1975ء کے بعد سب سے زیادہ ہے، کراچی پورٹ پر درآمدات کے ہزاروں کنٹینرز رکے ہوئے ہیں، کیونکہ حکومت زرمبادلہ کی کمی کی وجہ سے انہیں کلیئر کرنے سے قاصر ہے۔ اس نے اسے دیوالیہ پن کے دہانے پر دھکیل دیا ہے۔

عقلی معاشیات کو نظر انداز کرتے ہوئے انتظامی اقدامات کے ذریعے درآمدات کو کم کرنے اور ڈالر کو منجمد کرنے کی حکومت کی تباہ کن پالیسی نے ملک بھر میں قیمتوں کو بگاڑ دیا ہے۔

جنوری میں سالانہ بنیاد پر پیاز کی قیمتوں میں تقریباً 500 فیصد اضافہ ہوا، جب کہ چاول، دالوں اور گندم کی قیمتوں میں بھی ایک سال کے دوران تقریباً 50 فیصد اضافہ ہوا۔

ماہرین کا خیال ہے کہ وزیر خزانہ اسحاق ڈار کی جانب سے ڈالر کی قدر پر گرفت ڈھیلی کرنے کے بعد مہنگائی کی ایک اور لہر آنے والی ہے۔ جیسا کہ ڈالر کی قدر میں تیزی سے اضافہ ہو رہا ہے اور اب 270 روپے سے اوپر جا رہا ہے، توانائی سمیت اشیا کی قیمتیں بھی بڑھ جائیں گی۔

درحقیقت اسحاق ڈار کی بطور وزیر خزانہ تقرری کو مخلوط حکومت کی سب سے بڑی غلطی قرار دیا جا رہا ہے کیونکہ وہ اپنے دعووں کو پورا کرنے میں ناکام رہے ہیں۔ انہوں نے انتظامی اور غیر معقول اقدامات سے ڈالر کی بڑھتی ہوئی قدر کو قابو کرنے کی کوشش کی مگر ناکام رہے۔

اسٹیٹ بینک آف پاکستان کے زرمبادلہ کے ذخائر 27 جنوری 2023ء کو ختم ہونے والے ہفتے تک گر کر 3 اعشاریہ 086 ارب ڈالر رہ گئے، جو صرف 20 دنوں کے لیے درآمدی ادائیگی کے لیے کافی ہیں۔

مرکزی بینک کے سرکاری زرمبادلہ کے ذخائر تیزی سے کم ہو کر تقریباً نو سال کی کم ترین سطح پر آ گئے۔ اس سے قبل، فروری 2014ء میں اسٹیٹ بینک کے سرکاری زرمبادلہ کے ذخائر 3 اعشاریہ 87 ارب ڈالر تھے۔

مرکزی بینک کے پاس موجود زرمبادلہ کے ذخائر 27 اگست 2021ء کو ختم ہونے والے ہفتے تک 20 اعشاریہ 146 ارب ڈالر کی بلند ترین سطح پر پہنچ گئے تھے۔ تب سے اب تک ان میں 17 اعشاریہ 06 ارب ڈالر کی کمی واقع ہوئی ہے، جو موجودہ حکومت کے یکے بعد دیگرے دو وزرائے خزانہ مفتاح اسماعیل اور اسحاق ڈار کی نااہلی کو ظاہر کرنے کے لیے کافی ہے۔

اسحاق ڈار نے تجارتی خسارے کو کم کرنے اور ڈالر بچانے کے لیے درآمدات کے لیے لیٹر آف کریڈٹ (ایل سی) کے اجراء پر بھی سخت پابندیاں عائد کیں، جس سے بلیک مارکیٹ پروان چڑھی، جہاں ڈالر تقریباً 270 سے 280 روپے میں فروخت ہوا، جب کہ امریکی ڈالر کا انٹربینک ایکسچینج ریٹ 225 روپے تھا۔

ڈالر کی شرح کو محدود کرنے کے حکومتی ارادے نے آمدن، خاص طور پر بیرون ملک کام کرنے والوں کی ترسیلات زر اور برآمدی وصولیوں کو بری طرح متاثر کیا۔

سنچری کے چیف مارکیٹ تجزیہ کار ارون لیسلی جان نے کہا کہ حکومت کو ادائیگیوں کے توازن کے شدید بحران کا سامنا ہے، زرمبادلہ کے ذخائر درآمدی احاطہ کے تین ہفتوں سے بھی کم رہ گئے ہیں، جس کا مطلب ہے کہ کرنسی کی قدر میں شدید کمی واقع ہوئی ہے۔

ارون لیسلی جان نے مزید کہا، ’’حکومت کی جانب سے درآمدات میں کمی کے بعد اشیائے خوردونوش، خام مال اور آلات کے انتہائی ضروری کنٹینرز بندرگاہوں پر روک دیے گئے ہیں، جس کے نتیجے میں پیداوار رکنے سے قیمتیں مزید بڑھ رہی ہیں۔ اس کے علاوہ، 2022ء کے سیلاب نے اس کی کپاس کی فصل کو تباہ کر دیا، جو اس کی سب سے بڑی برآمد یعنی کاٹن ٹیکسٹائل کے لیے اہم ہے اور اس مسئلے کو مزید پیچیدہ کر رہا ہے۔‘‘

اس کے لیے اب حکومت کے پاس معاشی اصلاحات کے لیے آگے بڑھنے کے علاوہ کوئی راستہ نہیں ہے، جو کہ آبادی کے بڑے حصے کے لیے ایک کڑوی گولی ثابت ہوگی۔

ارون لیسلی جان نے کہا، ’’آئی ایم ایف بیل آؤٹ کو حاصل کرنے کے لیے ملک کو اصلاحات پر عمل کرنا ہوگا، خاص طور پر توانائی کے شعبے میں۔ جس میں توانائی کے شعبے کا قرضہ کل 4 ٹریلین روپے (14 اعشاریہ 55 ارب ڈالر) سے زیادہ ہے جس میں گیس کے شعبے کے 1 اعشاریہ 6 ٹریلین روپے شامل ہیں۔ مزید برآں، جیسا کہ آئی ایم ایف کے مطالبے پر، ملک مارکیٹ پر مبنی شرح مبادلہ کی طرف منتقل ہو گیا ہے اور ایندھن کی قیمتوں میں اضافہ کر دیا گیا ہے، جس سے توانائی پہلے سے زیادہ مہنگی ہو گئی ہے۔‘‘

سابق وزیر خزانہ شوکت ترین نے کہا کہ ہم پر مسلط نام نہاد تجربہ کار اور قابل پی ڈی ایم حکومت نے ملک کو دیوالیہ پن کے دہانے پر پہنچا دیا ہے۔ اب مزید بے عملی کا وقت نہیں ہے۔ وہ آئی ایم ایف کی شرائط پوری کریں اور ملک کو معاشی بدحالی سے بچانے کے لیے استعفیٰ دیں۔

انہوں نے کہا، ’’جنوری میں کنزیومر پرائس انڈیکس (سی پی آئی) بڑھ کر 27 اعشاریہ 6 فیصد اور خوراک کی افراط زر 39 فیصد تک پہنچ گئی۔ اس میں ایندھن کی قیمتوں میں تازہ ترین اضافہ شامل نہیں ہے۔ جیسا کہ ہم نے پیش گوئی کی ہے، آئی ایم ایف کی شرائط کے نفاذ کے بعد قیمتیں تیزی سے بڑھیں گی۔ پی ڈی ایم حکومت مہنگائی کو کم کرنے آئی تھی، جو مارچ 2022ء میں 12 اعشاریہ 2 فیصد تھی۔ یہ شرمناک ہے۔‘‘

ماہرین نے کہا کہ مہنگائی کی تازہ لہر ایک خاندان کی قوت خرید کو ختم کر دے گی اور اقتصادی منظرنامے کے نچلے طبقے کو نقصان پہنچائی گی۔

ارون لیسلی جان کے مطابق، پچھلے سال کے دوران عام آدمی کی قوت خرید میں زبردست کمی آئی ہے، جس کی وجہ سے وہ غربت کی زندگی گزار رہے ہیں۔

انہوں نے کہا، ’’مہنگائی نے یوٹیلیٹی، خوراک اور پیٹرول کی قیمتوں میں اضافہ کیا ہے، جس سے غربت میں رہنے والے لوگوں کی تعداد میں اضافہ ہوا ہے۔ روزمرہ کی اشیاء کی قیمتیں آسمان سے باتیں کر رہی ہیں، ڈیزل کی قیمتوں میں 61 فیصد اضافہ ہوا ہے، جب کہ پیٹرول کی قیمتوں میں 48 فیصد اضافہ ہوا ہے۔ بجلی کے نرخوں پر آئی ایم ایف کی شرائط کا اطلاق، محصولات بڑھانے اور مالیاتی خسارے کو کم کرنے کے لیے نئے ٹیکسوں کا نفاذ ایک تکلیف دہ عمل ہو گا جو براہ راست عام آدمی کو متاثر کرے گا۔‘‘

ایک آزاد تجزیہ کار اے اے ایچ سومرو نے کہا کہ سادہ الفاظ میں عوام کی قوت خرید میں ایک سال کے دوران 30 سے 40 فیصد تک کمی واقع ہوئی ہے۔

سومرو نے مزید کہا، ’’مستقبل کے لیے بچت کو تو چھوڑیں، اس طرح کے معاشی سکڑاؤ میں عوام کی بقا پر سوالیہ نشان لگ رہا ہے۔‘‘

ان کے مطابق، روپے کی قدر میں کمی، توانائی کی عالمی قیمتوں میں اضافہ اور آئی ایم ایف کی شرائط کے تحت مزید بالواسطہ ٹیکسوں سمیت کثیر الجہتی چیلنجز کی وجہ سے افراط زر میں اضافہ ہو رہا ہے۔

سومرو کا کہنا تھا کہ ’’ حکومت غیر مقبول اقدامات کرنے کے راستے پر ہے جو معیشت کو رواں دواں رکھنے کے لیے ضروری ہیں۔ ضروری سخت اقدامات کرنے کے بجائے وہ پانچ سالہ مینڈیٹ کو ترجیح دیں گے۔ جب ناگزیر کو ملتوی کر دیا جاتا ہے تو اصلاحی اقدام کرنا زیادہ مشکل ہوتا ہے۔‘‘