بلاول بھٹو زرداری نے مارچ میں حکومت کے خلاف احتجاجی تحریک شروع کرنے کا اعلان کردیا ہے۔

تفصیلات کے مطابق بلاول بھٹو زرداری نے حکومت کے خلاف احتجاجی تحریک شروع کرنے کا اعلان لیاری میں اربن فاریسٹ منصوبے کی افتتاحی تقریب میں کیا۔

پاکستان پیپلزپارٹی کے چیئرمین بلاول بھٹو زرداری کا لیاری میں اربن فاریسٹ منصوبے کی افتتاحی تقریب سے خطاب میں انہوں نے کہا کہ لیاری میں اربن فاریسٹ منصوبہ شروع کرنے پرخوش ہوں، جلد ملیرمیں بھی اس قسم کے منصوبے کا آغازکریں گے۔

ان کا کہنا تھا کہ ہم لیاری کے نوجوانوں کے مطالبات پورے کریں گے، نوجوانوں کوصحت افزا سرگرمیاں فراہم کرنے کے لیے اقدامات کریں گے کیونکہ لیاری کے نوجوان فٹ بال دیگرکھیلوں میں سب سے آگے ہیں۔

بلاول بھٹو کا کہنا تھا کہ زیادہ محنت کرکے صوبے کو وسائل دلائیں گے، سندھ حکومت دیگرصوبوں کے مقابلے زیادہ کام کر رہی ہے، یہ حکومت معاشی حقوق چھیننے کی کوشش کر رہی ہے۔

بلاول بھٹو زرداری کی  پیپلزپارٹی کے جنرل سیکریٹری اور نائب صدر سے ملاقات

انہوں نے تقریب سے خطاب کرتے ہوئے کہا کہ اس سال بھی140 بلین روپے این ایف سی کے تحت کم ملے، 140بلین روپے ملتے تو غریبوں کے لیے گھر بناسکتے تھے۔

چیئرمین پیپلزپارٹی کا کہنا تھا کہ وفاق حکومت آئی ایم ایف کے ساتھ دوبارہ بات کرے، عوام کے حقوق پر سودے بازی نہیں ہونی چاہیے۔

انہوں نے مزید کہا کہ مارچ سے پورے ملک میں ایک جدوجہدشروع کریں گے۔

اس موقع پر بلاول بھٹو کا کہنا تھا کہ عمران خان نے کروڑوں نوکریاں دینے کا وعدہ کیا، لاکھوں گھروں کے دینے کا کہا لیکن نوکریاں اور گھر دینے کے وہ لاکھوں گھر گرا چکے ہیں۔

انہوں نے کہا کہ انکی عوام دشمن پالیسی ہے اور عوام دشمن بجٹ ہے کیونکہ پی ٹی آئی ایم ایف کا بجٹ آنے سے مہنگائی بڑھی ہے، غربت بڑھی ہے اور یہ انکی نالائقی ہے۔

ان کا کہنا تھا کہ حکومت نے آئی ایم ایف سے قرض حاصل کرنے کے لیے صحیح پیکج حاصل نہیں کیا، انکی وجہ سے غربت بڑھی ہے۔