ایئر ہیڈ کوارٹرز اسلام آباد میں تبدیلی کمان کی پروقار تقریب کا انعقاد کیا گیا جس میں نئے ایئر چیف مارشل ظہیر احمد بابر سدھو نے کمان سنبھال لی ہے۔

پاک فضائیہ کے ترجمان کے مطابق ایئر چیف مارشل ظہیر احمد بابر سدھو نے آج سے نئے سربراہ کی حیثیت سے آج سے اپنی ذمہ داریاں سنبھالیں ہیں۔

ایئر مارشل ظہیر احمد بابر سدھو:

پاک فضائیہ کے نامزد ایئر چیف مارشل ظہیر احمد بابر سدھو کا تعلق گجرات کے گاؤں سدھ سے ہے جنہوں نے 1986 میں بحیثیت فائٹر پائلٹ پاک فضائیہ کی جی ڈی (پائلٹ) برانچ میں شمولیت اختیار کی۔

ظہیر احمد بابر سدھو فائٹر اسکواڈرن ، آپریشنل ایئر بیس اور علاقائی کمانڈ بھی کر چکے ہیں علاوہ ازیں انہوں نے ایئر ہیڈ کوارٹرز اسلام آباد میں اسسٹنٹ چیف آف دی ایئر اسٹاف (آپریشن ریسرچ اینڈ ڈویلپمنٹ) ، اسسٹنٹ چیف آف ایئر اسٹاف (ٹریننگ آفیسرز) اور ڈائریکٹر جنرل پروجیکٹس کے طور پر خدمات انجام دیں۔

وزارت دفاع میں بطور ایڈیشنل سیکرٹری، برطانیہ کے کامبیٹ کمانڈرز اسکول ، ایئر وار کالج اور رائل کالج آف ڈیفنس اسٹڈیز سے فارغ التحصیل ہیں۔

انہیں پیشہ وارانہ خدمات کے اعتراف میں ہلال امتیاز (ملٹری)، ستارہ امتیاز (ملٹری) اور تمغہ امتیاز (ملٹری) سے نوازا گیا ہے۔