سندھ اسمبلی میں اپوزیشن لیڈر حلیم عادل شیخ نے اپنے بیان میں کہا ہے کہ مجھے قتل کرنے کی نیت سے اغواء کروایا گیا تھا۔

تفصیلات کے مطابق اپوزیشن لیڈر سندھ اسمبلی حلیم عادل شیخ نے گلبرگ تھانے میں درج مقدمے میں اپنا بیان جمع کروا دیا ہے۔

جمع کرائے جانے والے بیان کے مطابق حلیم عادل شیخ کو رات 3:30 بجے اغواء کیا گیا تھا اور صبح 7:30 مقدمہ درج کیا گیا تھا ۔

انہوں نے اپنے بیان میں دعویٰ کیا ہے کہ  انہیں قتل کرنے کی نیت سے اغواء کیا گیا تھا اور اغواء کار مجھے قتل کرنے کا منصوبہ بنا رہے تھے۔

انہوں نے بتایا کہ اگر چینلز پر میرے اغواء کی سی سی ٹی وی فوٹیجز نہ چلتی تو مجھے قتل کردیا جاتا

حلیم عادل شیخ نے اپنے بیان میں کہا ہے کہ سندھ حکومت مجھے راستے سے ہٹانا چاہتی ہے پہلے ہی بتایا تھا بلاول ہاوس میں مجھے مارنے کا منصوبہ بنایا گیا ہے۔

انہوں نے بتایا ہے کہ میرے کمرے میں گھسنے والے افراد نے 10 لاکھ روپے مالیت کی گھڑی اور ڈیڑھ لاکھ روپے نقد بھی اٹھا لیے تھے۔

انہوں نے مطالبہ کیا ہے کہ میرے بیان کے مطابق مقدمہ میں دفعات کا اندراج کیا جائے۔