وزیر اطلاعات سندھ شرجیل انعام میمن نے کہا ہے کہ  ملک میں سب سے سستا آٹا سندھ میں فراہم کیا جارہا ہے۔

صوبائی وزیر اطلاعات شرجیل انعام میمن نے کراچی میں پریس کانفرنس کرتے ہوئے کہا کہ چند روز سے آٹے کی قیمتیں بڑھنے کا سن رہے ہیں، مارچ تک سندھ حکومت نے گندم خریدی ہوئی ہے۔

جس کے پاس زیادہ پیسہ ہے وہ بڑے اسٹورز سے آٹا خرید لے

انہوں نے کہا کہ 65 روپے کلو آٹا دے رہے ہیں، 1100 وین پورے صوبے میں موجود ہیں، سندھ حکومت نے اربوں روپے کی سبسڈی دی ہوئی ہے، سندھ واحد صوبہ ہے جہاں 65 روپے کلو آٹا دے رہے ہیں۔

صوبائی وزیر نے کہا کہ کوئی بھی شارٹیج نہیں ہے، جس کے پاس زیادہ پیسہ ہے وہ بڑے اسٹورز سے آٹا خرید لے، جہاں بھی شکایات ہیں اس کے نمبرز دیے ہوئے ہیں۔

عدم اعتماد کے معاملے پر پیپلز پارٹی لیڈر شپ پر سنگین الزامات لگائے گئے

انکا کہنا ہے کہ سانحہ ساہیوال میں پی ٹی آئی حکومت نے ان کے بری ہونے میں مدد کی، لیکن پیپلز پارٹی کی حکومت کسی کو بھی کوئی رعایت نہیں دے گئی۔

شرجیل انعام میمن نے کہا کہ عدم اعتماد کے معاملے پر پیپلز پارٹی لیڈر شپ پر سنگین الزامات لگائے گئے، اراکین کی خرید و فروخت کا کام ہمیشہ پی ٹی آئی نے کیا، عمران خان کی آڈیو بھی آئی تھی، جس میں وہ ممبران خریدنے کا اعتراف کرتے ہیں۔

وزیر اطلاعات سندھ نے کہا کہ کراچی میں کل جو پولیس کے ہاتھوں نوجوان قتل ہوا، اس پر فوری طور پر وزیر اعلیٰ نے نوٹس لیا۔

بلاول بھٹو نے کل تاریخی خطاب کیا

انہوں نے کہا کہ کل بی بی کی پندرہویں برسی میں ملک بھر سے لاکھوں کی تعداد میں پیپلز پارٹی کے جیالوں نے حاضری دی، لاکھوں کی تعداد میں پاکستان سے لوگ شریک ہوئے۔

صوبائی وزیر نے کہا کہ بلاول بھٹو نے کل تاریخی خطاب کیا، انہوں نے کامیاب وزیر خارجہ ہونے پر انہوں نے دنیا کے دورے کیے۔

شرجیل انعام میمن نے مزید کہا کہ عمران خان پورے دنیا کو آئسولیشن پر لے آئے تھے، بلاول بھٹو نے تمام ممالک سے تعلقات بہتر کیے۔