ویسٹ انڈیز کے کپتان کیرون پولارڈ ان فٹ ہوکر دورہ پاکستان سے باہر ہوگئے ہیں جب کہ ان کی جگہ نکولس پورن ٹی ٹونٹی سیریز کے لئے کپتان مقرر کئے گئے ہیں۔

بول نیوز کے مطابق پاکستان کے خلاف ٹی ٹوئنٹی سیریز کے لئے ویسٹ انڈیز کے کپتان کیرون پولارڈ ہیمسٹرنگ انجری سے صحت یاب نہیں ہوسکے۔ جس کی وجہ سے اب وہ پاکستان کے خلاف سیریز سے باہر ہوگئے ہیں۔

ویسٹ انڈین کرکٹ بورڈ نے نکولس پورن ٹی ٹوئنٹی سیریز جب کہ شائے ہوپ کو پاکستان کے خلاف ون ڈے اسکواڈ کا کپتان مقرر کردیا ہے۔ ون ڈے ٹیم میں ڈیون تھامس اور ٹی ٹونٹی کے لئے روومین پاول متبادل کھلاڑی ہوں گے۔

شیڈول کے مطابق ویسٹ انڈیز اور پاکستان کے درمیان 3 ٹی ٹوئنٹی اور 3 ایک روزہ میچوں کی سیریز کھیلی جائے گی۔ ویسٹ انڈین اسکواڈ 9 دسمبر کو کراچی پہنچے گا۔

دونوں ٹیموں کے درمیان ٹی ٹوئنٹی سیریز 13 دسمبر سے کراچی میں شروع ہوگی۔

واضح رہے کہ اپریل 2018 کے بعد یہ ویسٹ انڈیز کا پہلا دورہ پاکستان ہوگا۔ مہمان ٹیم تین ٹی ٹونٹی انٹرنیشنل میچز کھیلنے ‏‏2018 میں پاکستان آئی تھی۔ ویسٹ انڈیز نے آخری مرتبہ 2006 میں پاکستان کی سرزمین پر کوئی ون ڈے ‏انٹرنیشنل سیریز کھیلی تھی۔