تنزانیہ میں کرکٹ کے فروغ کیلئے ایک اہم پیش رفت سامنے آئی ہے جہاں انٹرنیشنل کرکٹ کونسل (آئی سی سی) کے چیئرمین جے شاہ نے تنزانیہ کرکٹ ایسوسی ایشن کے نئے جدید کرکٹ اسٹیڈیم کا افتتاح کردیا۔
نئے کرکٹ میدان کو تنزانیہ میں کھیل کے مستقبل کیلئے ایک اہم سنگ میل قرار دیا جا رہا ہے، جہاں جدید سہولیات کے باعث مقامی کھلاڑیوں، کوچز اور امپائرز کی تربیت کے نئے مواقع پیدا ہوں گے۔
افتتاحی تقریب سے خطاب کرتے ہوئے آئی سی سی چیئرمین جے شاہ نے کہا کہ یہ اسٹیڈیم تنزانیہ میں کرکٹ کے روشن مستقبل کی علامت ہے اور عالمی سطح پر کھیل کے فروغ میں اہم کردار ادا کرے گا۔
تنزانیہ رواں سال 8 سے 18 اگست تک عالمی کرکٹ چیلنج لیگ بی 2026 کی میزبانی کرے گا، جس کے بیشتر مقابلے اسی نئے اسٹیڈیم میں کھیلے جائیں گے۔
تنزانیہ کرکٹ ایسوسی ایشن کے مطابق جدید سہولیات سے آراستہ یہ میدان ملک میں بین الاقوامی مقابلوں کے انعقاد کی راہ ہموار کرے گا اور نوجوان کرکٹرز کو اپنی صلاحیتیں نکھارنے کا بہترین موقع فراہم کرے گا۔
کرکٹ ماہرین کے مطابق افریقی ملک میں نئے اسٹیڈیم کا قیام عالمی کرکٹ کے دائرہ کار کو مزید وسعت دینے اور نئے ٹیلنٹ کو سامنے لانے کی جانب ایک اہم قدم ہے۔
