ایرانی وزیرخارجہ جواد ظریف کا  کہنا ہے کہ سعودی عرب اور ایران کےپاس مذاکرات کےعلاوہ دوسرا کوئی راستہ نہیں ہے ان کا کہنا تھا کہ بات چیت براہ راست ہو یا کسی ثالث کے ذریعہ ہو ہم ہمیشہ مذاکرات کےلئےتیار ہیں ۔

 غیر ملکی خبررساں ادارے کے مطابق ترک میڈیا کو انٹرویو دیتے ہوئے ایرانی وزیرخارجہ نے کہا ہم نےکبھی ثالثی کی مخالفت نہیں کی ہے۔  ہم ہمیشہ پڑوسی ملک سعودی عرب سے ثالثی یا براہ راست مذاکرات کے لیے تیار ہیں۔

وزیراعظم پاکستان عمران خان کے حوالے سے انٹرویو کے دوران ایرانی وزیرخارجہ کا کہنا تھا کہہ ایران عمران خان کی ایران سعودیہ ثالثی کیلئےکوشش کا خیرمقدم کرتا ہے۔

ایرانی وزیرخارجہ جواد ظریف نے سعودی عرب سےمذاکرات کی حامی بھر تے ہوئے کہا کہ سعودی عرب ہمارا پڑوسی ہے،ہمیں ساتھ رہناہے جبکہ سعودی عرب کے لئے مذاکرات کے دروازے ہمیشہ کھلے رہیں گے۔

خطے میں ایران کے لیے سب سے بڑے دشمن سے متعلق سوال پر ایرانی وزیر خارجہ کا کہنا تھا کہ اسرائیل خطے میں سب سے بڑا خطرہ ہے کیونکہ صیہونی ریاست جوہری ہتھیار رکھتی ہے اور وہ کسی بھی بین الاقوامی تخفیف اسلحہ سے متعلق معاہدے میں شامل نہیں۔

واضح  رہے کہ وزیراعظم پاکستان عمران خان اتوار کو ایک روزہ دورے پر ایران جا ئیں گے جہاں وہ سعودی عرب اور ایران کے درمیان مذاکرات کے حوالے سے ایرانی قیادت سے بات چیت کریں گے۔