سینٹرل ریجن میں شدید دھند کے باعث مختلف موٹرویز کو ٹریفک کے لیے بند کر دیا گیا ہے۔ ترجمان سنٹرل ریجن کے مطابق موٹروے ایم۔3 فیض پور سے جڑانوالہ تک دھند کی وجہ سے ہر قسم کی ٹریفک کے لیے بند ہے۔

ترجمان نے بتایا کہ موٹروے ایم۔2 لاہور سے کوٹ مومن تک بڑی گاڑیوں کے لیے جبکہ موٹروے ایم۔4 پنڈی بھٹیاں سے عبدالحکیم تک بھی بڑی گاڑیوں کی آمد و رفت کے لیے بند کر دی گئی ہے۔ موٹرویز کی بندش کا مقصد عوام کی جان و مال کا تحفظ ہے۔

ترجمان کے مطابق دھند کے دوران لین کی خلاف ورزی خطرناک حادثات کا سبب بن سکتی ہے، اس لیے روڈ یوزرز کو لین ڈسپلن پر سختی سے عمل کرنے کی ہدایت کی گئی ہے۔

شہریوں سے اپیل کی گئی ہے کہ وہ غیر ضروری سفر سے اجتناب کریں اور ممکن ہو تو دن کے اوقات میں سفر کو ترجیح دیں۔

موٹروے پولیس کے مطابق دھند میں صبح 10 بجے سے شام 6 بجے تک کے اوقات نسبتاً محفوظ سمجھے جاتے ہیں۔ ڈرائیور حضرات فوگ لائٹس کا استعمال لازمی کریں، تیز رفتاری سے گریز کریں اور آگے چلنے والی گاڑی سے محفوظ فاصلہ برقرار رکھیں۔

ترجمان نے مزید کہا کہ کسی بھی رہنمائی یا مدد کے لیے موٹروے پولیس کی ہیلپ لائن 130 پر رابطہ کیا جا سکتا ہے۔ موٹروے پولیس شہریوں کے محفوظ سفر کو یقینی بنانے کے لیے ہمہ وقت مستعد ہے۔