کوئٹہ کے ایک اسپتال میں لیڈی ڈاکٹر پر تیزاب پھینکے جانے کے افسوسناک واقعے پر پاکستان شوبز انڈسٹری کی معروف اداکارہ ماہرہ خان نے شدید غم و غصے کا اظہار کیا ہے۔
ماہرہ خان نے اپنے انسٹاگرام اسٹوری میں واقعے کو ”وحشیانہ اور غیر انسانی عمل“ قرار دیتے ہوئے کہا کہ ایک ڈاکٹر اپنی ذمہ داریاں ادا کرتے ہوئے مریضوں کی زندگیاں بچا رہی تھی مگر اسے نشانہ بنا کر اس کے چہرے پر تیزاب پھینک دیا گیا۔
اداکارہ یکا کہنا تھا کہ متاثرہ ڈاکٹر ماہ نور ناصر ہسپتال میں ڈیوٹی انجام دے رہی تھیں جب ان پر یہ حملہ کیا گیا۔ یہ واقعہ نہ صرف افسوسناک بلکہ انتہائی سفاکانہ عمل ہے جس پر وہ شدید رنج اور غصے میں ہیں۔
ماہرہ خان نے کہا کہ متاثرہ ڈاکٹر تحفظ کی مستحق تھیں تاہم حملہ آور نے ایک خاتون کی زندگی اور مستقبل کو تباہ کرنے کی کوشش کی۔ یہ اقدام دراصل ایک انسان کو زندہ جلانے کے مترادف ہے۔
اداکارہ نے مردوں اور خواتین دونوں سے اپیل کی کہ وہ اس ظلم کے خلاف آواز بلند کریں تاکہ ایسے واقعات کی روک تھام ممکن بنائی جاسکے۔
واضح رہے کہ کوئٹہ کے سنڈیمن پروونشل اسپتال میں ایک شخص نے لیڈی ڈاکٹر پر تیزاب پھینکا جس کے نتیجے میں وہ شدید زخمی ہوگئیں۔
ابتدائی طبی امداد کے بعد متاثرہ ڈاکٹر کو نجی اسپتال منتقل کیا گیا، بعد ازاں بہتر علاج کے لیے انہیں ایئر ایمبولینس کے ذریعے کراچی منتقل کر دیا گیا جہاں وہ زیر علاج ہیں۔
