عالمی وبا کورونا وائرس کے بڑھتے کیسز کو دیکھتے ہوئے ترک حکومت نے ملک میں‌ ایک بار پھر پابندیاں مزید سخت کرتے ہوئے جزوی لاک ڈاؤن کا فیصلہ کر لیا۔

بین الاقوامی ذرائع ابلا غ کے مطابق ترک صدر طیب اردوان کا اس سلسلے میں کہنا ہے کہ ترکی میں ہفتے کے اختتام تک جزوی لاک ڈاؤن ہو گا جبکہ سال کے اختتام تک اسکولز بھی بند رہیں گے۔

ترک صدر نے کہا کہ ترکی میں آن لائن ایجوکیشن کا سلسلہ جاری رہے گا جبکہ ریسٹورنٹس صرف ڈلیوری سروس مہیا کرسکیں گے۔

دنیا بھر میں کورونا کی صورتحال

 دنیا کا کوئی خطہ کورونا وائرس وائرس سے محفوظ نہیں، اس کے مریضوں اور اموات میں مسلسل اضافہ جاری ہے۔

دنیا بھر میں کورونا وائرس سے متاثرہ افراد کی تعداد 5 کروڑ 59 لاکھ 43 ہزار 122 تک جا پہنچی ہے جبکہ اس عالمی وائرس سے ہلاکتیں 13 لاکھ 43 ہزار 378 ہو گئیں۔

کورونا وائرس کے کیسز اور اس سے اموات کے اعتبار سے 10 سرِ فہرست ممالک میں 33 کروڑ سے زائد آبادی کا حامل امریکا پہلے نمبر پر ہے۔

امریکا میں اس وائرس سے اب تک 2 لاکھ 54 ہزار 255 افراد موت کے منہ میں پہنچ چکے ہیں جبکہ اس سے بیمار ہونے والوں کی مجموعی تعداد 1 کروڑ 16 لاکھ 95 ہزار 711 ہو چکی ہے۔

ایک ارب سے زائد آبادی والا ملک بھارت کورونا وائرس کے مریضوں کی تعداد میں تیزی سے اضافے کے ساتھ اس فہرست میں دوسرے نمبر پر ہے، جہاں اس سے 1 لاکھ 31 ہزار 31 ہلاکتیں ہو چکی ہیں جبکہ اس موذی وائرس سے متاثرہ مریضوں کی تعداد 89لاکھ 12 ہزار 907 ہو گئی۔

 یورپی ملک اسپین میں کورونا وائرس کی مہلک ترین وبا نے گزشتہ ہفتے 1082 افراد کی جان لی جبکہ 24 گھنٹوں کے دوران 3 ہزار3 سو 21 مزید افراد میں مہلک وائرس کی تصدیق ہوئی ہے۔