چیئرمین قائمہ کمیٹی برائے دفاع مشاہد حسین سید نے کہا کہ پاک افغان بارڈر پر باڑ کی تنصیب ایک بڑا کارنامہ ہے۔

تفصیلات کے مطابق مشاہد حسین سید کی صدارت میں سینیٹ کی قائمہ کمیٹی برائے دفاع کا اجلاس ہوا جس میں وزارت دفاع حکام کی جانب سے  مسلح افواج اور وزارت کے تحت اداروں کے امور سے متعلق تعارفی بریفنگ دی گئی۔

وزارت دفاع حکام کے مطابق پاک افغان سرحد پر باڑ کی تنصیب کا مشکل ترین ٹاسک کامیابی سے مکمل کیا جا رہاہے ، پاک افغان اور پاک ایران بارڈر کے ایک ایک انچ پر باڑ لگ رہی ہے ، یہاں تک کے دنیا کی بلند ترین چوٹیوں میں شامل ترچ میر پر بھی باڑ لگائی جا رہی ہے۔

ذرائع کے مطابق قائمہ کمیٹی دفاع کی جانب سے مغربی سرحد محفوظ بنانے کے عمل میں فورسز کی قربانیوں کو زبردست خراج تحسین پیش کیا گیا۔

مشاہد حسین سید نے مغربی سرحد پر باڑ کی تنصیب کے عمل کا مشاہدہ کرنے کی خواہش کا اظہار کیا اور کہا کہ ہم جا کر دیکھنا چاہتے کہ فورسز کتنا بڑا کارنامہ سر انجام دے رہی ہیں۔

حکام وزارت دفاع کے مطابق سروے آف پاکستان حکومتی ہدایت پر سیاحتی میپ بنا رہا ہے ، سروے آف پاکستان کو مختلف علاقوں میں مساجد کے قبلہ رخ تعین میں مدد کا بھی کہا گیا ہے۔

ذرائع کے مطابق قائمہ کمیٹی کو پاکستان ایئر فورس کے تعلیم و سماجی  کے شعبوں میں اقدامات کی تفصیلات سے بھی آگاہ کیا گیا۔

حکام وزارت دفاع کے مطابق پی ایم پورٹل پر وزارت دفاع سے متعلق 45ہزار سے زائد شکایات موصول ہوئیں جن میں سے اکتالیس ہزار سے زائد شکایات کو اب تک سیٹل کیا گیا ہے۔

مشاہد حسین سید نے کہا کہ شکایات پر نوٹس لینے کی شرح کافی اچھی ہے۔