وزیراعظم عمران خان نے کہا کہ عام لوگوں کو گھر کی فراہمی کے لیے نیا پاکستان ہاؤسنگ اسکیم شروع کی ہے۔

تفصیلات کے مطابق وزیراعظم عمران خان نے پاکستان پراپرٹی ،ہاؤسنگ اور کنسٹرکشن ایکسپو2021کی افتتاحی تقریب میں خطاب کرتے ہوئے کہا کہ پاکستان میں تمام را مٹیریل موجود ہے ، ملک میں دیہاڑی دار لوگوں کو موقع ہی نہیں ملا کہ اپنا گھر بنا سکیں ، اب بینک لوگوں کوہاؤسنگ فنانس کیلئے پیسے دیں گے۔

انہوں نے کہا کہ پاکستان میں عام لوگوں کو گھر کی ضرورت ہے ، تاریخ میں پہلی بار عام آدمی کے پاس اپنا گھر ہوگا،قرضہ بینک دے گا ، وہ ملک کبھی ترقی نہیں کرسکتا جہاں ایک طبقہ امیر اور زیادہ لوگ غریب ہوں ، بھارت میں اس وقت غربت کی انتہا ہے۔

وزیراعظم نے کہا کہ ماضی میں کبھی غریب طبقے کیلئے کوئی پالیسی ہی نہیں بنائی گئی ، کورونا کےدوران آئی ایم ایف کو فون کرکے کنسٹرکشن سیکٹر کیلئے رعایت لی ، تعمیراتی شعبے میں تیزی سے ترقی ہورہی ہے ، ہماری کوشش غریب طبقے کو اوپر اٹھانا ہے ، نیا پاکستان ایک جدوجہد کا نام ہے۔

عمران خان نے کہا کہ ہاؤسنگ سیکٹرکی ہرممکن مدد کریں گے ، ایف بی آر میں اصلاحات لانے کی کوشش کررہے ہیں ، کنسٹرکشن سیکٹر میں سب سے زیادہ روزگار کے مواقع ہوتے ہیں ، سسٹم تبدیل کرنے میں وقت لگتا ہے ، پاکستان میں مائنڈ سیٹ تبدیل کرنے کا کام شروع ہوگیا ہے۔

انہوں نے کہا کہ پاکستان میں تنخواہ دارطبقےکاکسی نےنہیں سوچاتھا ، پاکستان میں عام لوگوں کو گھر کی ضرورت ہے ، ہماری کوشش غریب طبقےکواوپراٹھاناہے ، یہ نہیں ہوسکتا چھوٹا ساطبقہ امیرہوجائے۔

وزیراعظم عمران خان نے کہا کہ وہ ملک ترقی نہیں کرسکتاجس میں چھوٹاساطبقہ امیرہو ، چین نےسب سےپہلےکمزورطبقے کی مدد کی ، پاکستان میں کمزورطبقے کیلئے کبھی پالیسی نہیں بنائی گئی۔