قومی کرکٹ ٹیم کے ہیڈ کوچ مصباح الحق نے کہا ہے کہ میرا کوچنگ کے لئے دوبارہ اپلائی کرنے کا ارادہ نہیں ہے۔

مصباح الحق نے میڈیا سے گفتگو کرتے ہوئے کہا کہ مجھے بھاگنے کی ضرورت نہیں تھی دو سال ٹیم کے ساتھ کھڑا رہا، میں ٹیم کو چھوڑ کر کیوں بھاگوں گا؟ میرا دوبارہ کوچنگ کے لئے اپلائی کرنے کا ارادہ نہیں ہے۔

ان کا کہنا تھا کہ ثقلین مشتاق اور ان کے ساتھیوں نے اب تک اچھا کام کیا ہے، بابر اعظم کا کپتان ہونا لانگ ٹرم فیصلہ تھا، بابر اعظم نے اچھے نتائج دئیے ہیں، چھوٹی موٹی غلطیاں تجربہ کار کپتانوں سے ہوتی ہیں، کوچنگ سے الگ ہونے کا فیصلہ دونوں جانب سے انڈر اسٹینڈنگ کے ساتھ ہوا۔

انہوں نے کہا کہ دو سالوں میں پاکستان ٹیم مجموعی طور اچھا کھیلی، اگر کوئی یہ سمجھتا کہ میرے جانے کے بعد ٹیم اچھا کھیلی تو یہ بھی مان لیتے ہیں، پاکستان ٹیم اچھا کھیلی یہ خوشی کی بات ہے میرے لئے بھی اور سب کے لئے بھی، ڈومیسٹک کرکٹ میں ریزلٹ نہیں آرہے۔

 ہیڈ کوچ کا کہنا تھا کہ لمبے لمبے اسکور ہو رہے ہیں اس کو دیکھنا ہوگا، بیٹ اور بال میں توازن ہونا چاہیے، سینٹرل پنجاب میں کلب اور اسکول کرکٹ پر اچھا کام ہو رہا ہے، دوسری ایسوسی ایشنز میں بھی اس حوالے سے کام ہو رہا ہے۔

 قومی کرکٹ ٹیم کے ہیڈ کوچ مصباح الحق نے مزید کہا کہ گراس روٹ لیول پر کام ہونا اچھی بات ہے، پاکستان ٹیم نے بہت اچھا کھیلا ہے، پاکستان ٹیم بد قسمت رہی ہے ایک میچ کی وجہ سے آؤٹ ہو گئی۔