مشترکہ اعلامیے میں کہا گیا کہ پاکستان اور چین کی دہائیوں پر محیط دوستی دونوں ممالک کا قیمتی اثاثہ اور اسٹریٹجک سرمایہ ہےجو بدلتے ہوئے بین الاقوامی اور علاقائی حالات کے باوجود فولادی ثابت ہوئی۔ دونوں ممالک نے اس بات کا اعادہ کیا کہ انہوں نے ہر مشکل وقت میں ایک دوسرے کا ساتھ دیا ہے اور مستقبل میں بھی ایک دوسرے کے بنیادی قومی مفادات پر غیر متزلزل حمایت جاری رکھیں گے۔

پاکستان نے ایک چین پالیسی سے اپنی وابستگی کا اعادہ کرتے ہوئے کہا کہ تائیوان چین کا ناقابلِ تنسیخ حصہ ہے، جبکہ چین نے پاکستان کی خودمختاری، علاقائی سالمیت اور قومی سلامتی کے لیے اپنی مستقل حمایت کا اعادہ کیا۔

اعلامیے کے مطابق دونوں ممالک نے سی پیک 2.0 کے تحت اعلیٰ معیار کے منصوبوں کو آگے بڑھانے پر اتفاق کیا۔ صنعتی پارکس، ٹیکسٹائل، گھریلو آلات، معدنیات، تیل و گیس اور زراعت کے شعبوں میں تعاون بڑھانے پر بھی اتفاق کیا گیا۔ اس کے علاوہ توانائی، ڈیجیٹل معیشت، مصنوعی ذہانت اور مواصلاتی شعبوں میں تعاون کو فروغ دینے پر بھی زور دیا گیا۔

چین نے پاکستانی زرعی مصنوعات کی چینی منڈی تک رسائی آسان بنانے کا اعلان کیا، جبکہ 2025 سے 2029 کے دوران پاکستان کے لیے 3000 تربیتی مواقع فراہم کرنے کے عزم کا بھی اعادہ کیا گیا۔

دونوں ممالک نے تعلیم، ثقافت، خلائی تعاون اور عوامی روابط کو مزید فروغ دینے پر اتفاق کیا۔ چین نے دو پاکستانی خلابازوں کی تربیت کا خیرمقدم کیا اور مستقبل میں ایک پاکستانی خلاباز کو چینی خلائی اسٹیشن بھیجنے کے منصوبے کا بھی اعلان کیا۔