برمنگھم: کامن ویلتھ گیمز میں پاکستان کے لیے پہلا گولڈ میڈل حاصل کرنے والے نوح دستگیر بٹ قوم کے شکر گزار ہیں۔

کامن ویلتھ گیمز میں گولڈ میڈل جیتنے والے نوح دستگیر بٹ کا میڈیا سے گفتگو کرتے ہوئے کہنا تھا کہ جن لوگوں نے میرے لیے دعائیں کیں سب کا شکریہ ادا کرتا ہوں۔

انہوں نے کہا کہ آج کی جیت اور گولڈ میڈل اپنے والد کے نام کرتا ہوں، انہوں نے میرے گولڈ میڈل کے لئے بارہ سال محنت کی۔

ان کا مزید کہنا تھا کہ امید نہیں تھی مجھے کہ اتنے زیادہ پاکستانی سپورٹ کرنے آئیں گے۔

واضح رہے کہ نوح دستگیر بٹ نے کامن ویلتھ گیمز میں پاکستان کے لیے پہلا گولڈ میڈل حاصل کیا ہے جبکہ انہوں نے 109 کلو گرام کیٹیگری میں نیا ریکارڈ بھی بنا ڈالا ہے۔

نوح دستگیر بٹ نے 109 کلو گرام کیٹیگری میں سنیچ کی پہلی کوشش میں 170 کلوگرام وزن اٹھایا، دوسری کوشش میں 173 کلوگرام اور تیسری کوشش میں 174 کلو گرام وزن اٹھا کر پاکستان کے لیے پہلا گولڈ میڈل حاصل کیا ہے۔

نیوزی لینڈ کے ویٹ لفٹر نے سلور میڈل حاصل کیا جبکہ بھارت کے ویٹ لفٹر گردیپ سنگھ کی تیسری پوزیشن رہی۔