ایک نئی سائنسی تحقیق میں انکشاف ہوا ہے کہ نائٹریٹ سے بھرپور چقندر کا جوس بزرگ افراد میں بلڈ پریشر کم کرنے میں مددگار ثابت ہوسکتا ہے۔ تحقیق کے مطابق اس کا تعلق منہ میں موجود بیکٹیریا اور نائٹریٹ کو نائٹرک آکسائیڈ میں تبدیل کرنے کے عمل سے ہے۔

یونیورسٹی آف ایکسیٹر کے سائنسدانوں نے 30 سال سے کم عمر 39 افراد اور 60 سے 70 سال کی عمر کے 36 افراد پر تحقیق کی۔ شرکاء کو دو ہفتوں تک نائٹریٹ سے بھرپور چقندر کا جوس دیا گیا، جس کے بعد ان کے بلڈ پریشر اور منہ کے مائیکرو بایوم میں ہونے والی تبدیلیوں کا جائزہ لیا گیا۔

محققین کے مطابق نائٹریٹ جسم میں نائٹرک آکسائیڈ بنانے میں مدد دیتے ہیں جو خون کی شریانوں کو پھیلانے اور انہیں پرسکون رکھنے میں کردار ادا کرتا ہے۔ یہی عمل بلڈ پریشر کو کم کرنے میں معاون ہوسکتا ہے۔

یہ بھی پڑھیں: ہائی بلڈ پریشر کے مریضوں کو کافی پینی چاہیے یا نہیں؟ ماہرین کی اہم رہنمائی

تحقیق میں خاص طور پر بزرگ افراد کے منہ کے مائیکرو بایوم میں نمایاں تبدیلیاں دیکھی گئیں۔ بعض نقصان دہ بیکٹیریا میں کمی جبکہ صحت کے لیے مفید بیکٹیریا میں اضافہ ہوا۔ اسی گروپ میں دو ہفتوں تک نائٹریٹ سے بھرپور جوس استعمال کرنے کے بعد بلڈ پریشر میں بھی کمی ریکارڈ کی گئی۔

تحقیق کے مطابق نائٹریٹ سے بھرپور غذاؤں کے فوائد صرف چقندر تک محدود نہیں۔ پالک، ارجولا، سونف، اجوائن اور بند گوبھی بھی نائٹریٹ کے اچھے غذائی ذرائع سمجھے جاتے ہیں۔

یونیورسٹی آف ایکسیٹر کے ماہرین کا کہنا ہے کہ عمر بڑھنے کے ساتھ جسم میں نائٹرک آکسائیڈ کی پیداوار کم ہوسکتی ہے، جبکہ ہائی بلڈ پریشر کا خطرہ بڑھ جاتا ہے۔ اس لیے نائٹریٹ سے بھرپور سبزیوں کو متوازن غذا کا حصہ بنانا صحت مند بڑھاپے کے لیے مفید ثابت ہوسکتا ہے۔

تاہم ماہرین کے مطابق اس تحقیق کے نتائج کو مزید بڑے اور طویل مدتی مطالعات کے ذریعے جانچنے کی ضرورت ہے۔ چقندر یا دیگر نائٹریٹ سے بھرپور غذاؤں کو بلڈ پریشر کی تجویز کردہ ادویات کا متبادل نہیں سمجھنا چاہیے۔