کبھی  کبھی آپ کا صبح اُٹھ کر دل کرتا ہوگا کہ دفتر سے چھٹی کرلی جائے اور اکثر آپ ایسا کرنے کے لئے نئے نئے بہانے بھی تلاش کرتے ہوں گے  تو آئیے ہم آپ کو بتاتے ہیں کہ اس کے لیے بہترین بہانہ کون سا ہوسکتا ہے۔

برطانوی نشریاتی ادارے کے مطابق ایک سروے میں یہ انکشاف ہوا ہے کہ ہر پانچ میں سے تین بالغ افراد چھٹی لینے کے لیے بیمار ہونے کا بہانہ کرتے ہیں۔

برطانوی قومی ادارہ شماریات کے مطابق ہر برس ایک شخص اوسطاً چار دن بیماری کی مد میں چھٹی لیتا ہے۔

سروے کے مطابق دفاتر میں نوجوان افراد اپنے سے بڑی عمر کے افراد کی نسبت زیادہ جھوٹ بولتے پائے گئے ہیں۔ تاہم حکومت کی جانب سے جاری کردہ اعداد و شمار میں ’جھوٹ بولنے کی بیماری‘ کا کوئی تذکرہ نہیں ہے۔

ایک رپورٹ کے مطابق سنہ 2018 میں چھٹی لینے کی بڑی وجوہات میں نزلہ زکام، کمر کا درد، دماغی حالت متوازن نہ ہونا اور ’دیگر‘ بیماریاں سرفہرست رہیں۔

یہ سروے  ایک نجی تحقیقی کمپنی کی مدد سے کیا گیا ہے۔ اس سروے کے دوران 3655 بالغ افراد سے سوالات کیے گئے۔

سروے میں یہ بات بھی سامنے آئی کہ چھٹی کے لیے بیماری کا بہانہ کرنے کے علاوہ چند ملازمین اپنے ساتھیوں کے لیے ڈھال بننے کے لیے  بھی ہمیشہ تیار رہتے ہیں، یہ معلوم ہونے کے باوجود کہ ان کا ساتھی اپنی بیماری کے بارے میں جھوٹ بول رہا ہے۔

سروے  کے مطابق 66 فیصد لوگ اپنے باس کو کبھی یہ نہیں بتاتے کہ درحقیقت ان کا دوست بیمار نہیں بلکہ چھٹی کے لیے بہانہ بنائے ہوئے ہے۔

ایک اور نجی ادارے کی جانب سے 2016 میں کیے گئے سروے  کے مطابق پیٹ میں درد ایک ایسا بہانہ ہے جو مالکان میں سب سے زیادہ ہمدردی پاتا ہے۔

اس کے علاوہ نزلہ، سر درد، ذہنی دباوٴ یا ایسے دیگر بہانے بناتے ہیں انہیں باس کی جانب سے شک کی نگاہ سے دیکھا جاتا ہے ۔