ترکی اور صومالیہ کی بحری افواج نے قزاقوں کے قبضے سے مال بردار جہاز ایم وی لٹوف کو 10 روزہ کارروائی کے بعد آزاد کرا لیا جھڑپ کے دوران 14 قزاق مارے گئے۔
صومالی وزارت دفاع کے مطابق جہاز کو 17 اگست کو شمال مشرقی علاقے نگال کے ضلع ایل کے قریب جفلے کے ساحل سے قزاقوں نے ہائی جیک کرلیا تھا۔
مشترکہ آپریشن میں قزاقوں کی چار کشتیاں تباہ کردی گئیں جبکہ سیکیورٹی فورسز کی مسلسل کارروائی کے دباؤ پر باقی قزاق جہاز چھوڑ کر فرار ہوگئے۔
صومالی اور ترک فورسز نے بعد ازاں ایم وی لٹوف کا مکمل کنٹرول سنبھال لیا، جس کے بعد جہاز نے بحفاظت اپنا سفر دوبارہ شروع کردیا۔
صومالی وزارت دفاع کا کہنا ہے کہ کارروائی ترکی اور صومالیہ کے درمیان دفاعی تعاون کے معاہدے کے تحت کی گئی جس کا مقصد صومالیہ کی ساحلی حدود کے تحفظ، بحری سلامتی اور قزاقی کے خلاف کارروائیوں کو مؤثر بنانا ہے۔
وزارت دفاع نے خبردار کیا ہے کہ قزاقی میں ملوث افراد، ان کے سہولت کاروں اور معاونت کرنے والوں کے خلاف قانون کے مطابق سخت کارروائی کی جائے گی۔
ترکی اور صومالیہ کے درمیان فروری 2024 میں طے پانے والے دفاعی و اقتصادی تعاون کے معاہدے کے تحت ترکی صومالیہ کی سمندری حدود کے تحفظ، بحری وسائل کی نگرانی اور غیر قانونی سرگرمیوں کے تدارک میں معاونت فراہم کر رہا ہے۔
