سندھ کے علاقے میں ہوئی ایک انوکھی شادی جس میں حق مہر کی شرط کی وجہ سے دولہا دلہن کو شادی والے دن عدالت جانا پڑگیا۔

یہ واقعہ ہے سندھ کے شہر نظیرآباد کا جہاں 32 سالہ صفیہ نامی خاتون کا نکاح 45 سالہ حبیب سے ایک ماہ قبل ہوا ہے۔

ان کے نکاح کے وقت حق مہر کے حوالے سے پوچھا گیا تو دلہن نے انوکھی شرط رکھی۔

اس حوالے سے صفیہ نے کہا کہ، میرا حق مہر ایسا ہو جس سے دوسروں کو فائدہ پہنچے اور وہ یہ ہے کہ 32 غریب قیدیوں کو میرا شوہر رہائی دلوائے اور 32 ہی نفل کی ادائیگی بھی کرے۔

حبیب کا کہنا تھا کہ، ” جب میں نے حق مہر سُنا تو میرے ہوش اڑ گئے کیونکہ مجھے لگا تھا کہ صفیہ روایتی زیور اور پیسوں کا مطالبہ کرے گی، مگر مجھے نہیں پتہ تھا کہ یہ ہمارے معاشرے کی ایک سچی وکیل بن کر سامنے آئے گی، جہاں غریب قیدیوں کو قید سے چھڑوانا مشکل ہوتا کیونکہ اس سب میں کچھ رقم درکار ہوتی، بہرحال مجھے خوشی ہے کہ میری بیوی اتنی سمجھدار اور سگھڑ ہے، مگر مجھے اس کی شرط کو پورا کرنے کے لئے شادی کے دن کورٹ جانا پڑ گیا جس پر مجھے ہنسی بھی آ رہی ہے۔