دل جوان ہو تو کوئی چیلنج مشکل نہیں رہتا اور اب اس کی ایک مثال امریکا میں سامنے آئی ہے جب ایک ساتھ 100 سے زائد اسکائی ڈائیور (آسمان سے چھلانگ لگانے والے) نے ایک ساتھ زمین کا رخ کیا اور ان میں سے ہر ایک کی عمر 60 برس یا اس سے زائد تھی۔ اس طرح عمررسیدہ افراد کی اتنی بڑی تعداد کی فضائی جست کا یہ نیا ریکارڈ بھی ہے۔

کیلیفورنیا میں لگ بھگ 107 پروفیشنل اسکائی ڈائیور نے یہ ریکارڈ قائم کیا ہے ۔ انہیں انگریزی میں اسکائی ڈائیور اوور سکسٹی یا ایس او ایس کا نام دیا گیا ہے۔ تمام افراد اتوار کی ایک خوشگوار دوپہر کو ریور سائڈ کاؤنٹٰی میں جمع ہوئے۔ پیراشوٹ پہنے، طیاروں میں سوار ہوئے اور مخصوص بلندی سے جست لگا کر برف کے ذرے یا سنوفلیک شکل کی فارمیشن بنائی جو تاریخ کا ایک حصہ بن گئی۔

لیکن اس خبر کا سب سے دلچسپ پہلو یہ ہے کہ اس مظاہرے میں شریک افراد کی عمریں 60 سے 78 برس تھیں اور ایک روز میں انہوں نے ایک جگہ جڑنے کی سات مرتبہ کوشش کی جن میں سے چھ ناکام ہوئیں اور بالآخر ساتویں کوشش رنگ لے آئی اور یہ ریکارڈ قائم ہوگیا۔ اس طرح تمام افراد سات مرتبہ جہاز پر سوار ہوئے اور سات مرتبہ جست لگائی

آخری کوشش میں تمام افراد فضا میں جڑنے سے کامیاب ہوئے لیکن صرف ایک شخص تھا جو فضائی کارواں سے بچھڑ گیا۔ یہ ایک بڑا مظاہرہ تھا جس میں کئی لوگ شامل تھے اور یہی وجہ ہے کہ اس میں بار بار ناکامی کا سامنا ہوا۔

اگلی کوشش میں یہی گروپ دوبارہ طبع آزمائی کرے گا اور نیا ریکارڈ قائم کرنے کی کوشش کرے گا۔