کراچی: عالمی گولڈ مارکیٹ میں مسلسل اضافے کے باعث سونے کی قیمتیں ایک ہفتے کے دوران نمایاں طور پر بڑھ گئی ہیں جبکہ مقامی سطح پر خریداری میں واضح کمی دیکھنے میں آرہی ہے۔

عالمی مارکیٹ میں گزشتہ ایک ہفتے کے دوران سونا 123 ڈالر بڑھ کر 4165 ڈالر فی اونس پر ٹریڈ ہونے لگا ہے، جس کے نتیجے میں مقامی قیمتوں میں بھی تیزی دیکھی گئی۔

پاکستان میں فی تولہ سونا ایک ہفتے کے دوران 12300 روپے اضافے کے ساتھ 4 لاکھ 38 ہزار 862 روپے تک پہنچ گیا۔ اسی طرح دس گرام سونے کی قیمت 10542 روپے بڑھ کر 3 لاکھ 76 ہزار 253 روپے ہوگئی ہے۔

مزید پڑھیں: سونے کی قیمت میں مزید اضافہ؛ نئی قیمت کتنی ہوگئی؟

دوسری جانب چاندی کی قیمت میں بھی اضافہ ہوا ہے، جو ایک ہفتے میں 420 روپے بڑھ کر 5642 روپے فی تولہ تک جاپہنچی ہے۔

سونے کی بڑھتی ہوئی قیمتوں کے باوجود دکانداروں کے مطابق مقامی مارکیٹ میں خریداری کی سرگرمیاں کم ہوگئی ہیں اور سرمایہ کار زیادہ تر عالمی مارکیٹ کی صورتحال کا جائزہ لے رہے ہیں۔