وزیر خارجہ مخدوم شاہ محمود قریشی کا کہنا ہے کہ سید علی گیلانی کے انتقال پر پوری قوم غمزدہ ہے۔

تفصیلات کے مطابق وزیر خارجہ مخدوم شاہ محمود قریشی نے چھٹے تھنک ٹینک فورم سے خطاب کرتے ہوئے کہا ہے کہ سب سے پہلے میں سید علی گیلانی کے انتقال پر اپنے دکھ اور افسوس کا اظہار کرنا چاہتا ہوں۔

شاہ محمود قریشی کا کہنا تھا کہ مجھے دکھ ہے کہ جس طرح ہندوستانی فورسز نے کل رات ان کے گھر کا گھیراؤ کیا وہ انتہائی افسوس ناک ہے، میں کل سے شدید اضطراب میں ہوں۔

ان کا کہنا تھا کہ وہ آج ہم میں موجود نہیں ہیں لیکن ان کی خوشبو ان کے رہنما اصولوں کے باعث ہمیشہ تروتازہ رہے گی اور دنیا بھر کے کشمیریوں کیلئے مشعل راہ ثابت ہو گی۔

شاہ محمود قریشی نے کہا کہ ہم اپنے ہمسائے میں اہم واقعات رونما ہوتے دیکھ رہیں جن کے خطے اور اجتماعی برادری کے لیے بحیثیت مجموعی دور رس مضمرات ہیں ، حالات ایک نہایت باریک بینی اور احتیاط سے مرتب کردہ پالیسی کے متقاضی ہیں تاکہ مسائل سے بچا جاسکے اور وہ مقصد حاصل ہوسکے جس کے لیے ہم گزشتہ کئی برس سے محوجستجو ہیں یعنی ایک پرامن اور خوش حال افغانستان کا قیام ہے۔

ان کا کہنا تھا کہ اس سے قبل کہ میں افغانستان پر ہماری پالیسی کے نمایاں نکات کواجاگر کروں حالیہ صورتحال پر چندگزارشات سے آپ کو ہماری پالیسی سے متعلق بنیادی تصور واضح ہوجائے گا۔

شاہ محمود قریشی کا مزید کہنا تھا کہ دو دہائیوں میں عالمی اتحاد نے فوجی انداز فکر اپناتے ہوئے افغانستان میں امن کے حصول کی کوشش کی جو میری دانست میں زمینی حقائق پر مبنی نہیں تھا۔

انہوں ںے بتایا کہ فوجی حل پر اصرار کے نتیجے میں سیاسی عمل کی راہ میں رکاوٹیں حائل رہی ہیں، دوہا امن معاہدہ افغانستان کے قائدین کے لیے ایک نئی امید لایا ہے۔

ان کا کہنا تھا کہ بدقسمتی سے بین الافغان مذاکرات میں نہایت کم پیش رفت ہوئی ہے، غیریقینی کی صورتحال میں مزید پیچیدگی 31 اگست 2021 کو افواج کے انخلاء کے اچانک امریکی اعلان سے پیدا ہوئی ہے۔

شاہ محمود قریشی کا کہنا تھا کہ افغان قیادت میں افغانوں کو قبول مذاکرات کے ذریعے سیاسی تصفیہ کی غیرموجودگی میں بین الاقوامی افواج کے انخلاء نے افغان قیادت کے لیے اپنی نوعیت کے نئے مسائل و مشکلات اور امکانات پیدا کردئیے ہیں۔

ان کا کہنا تھا کہ طالبان مستقبل کے سیاسی نظام سے متعلق افغان رہنماوں سے بات چیت کررہے ہیں تاہم آج کے دن تک صورتحال نازک ہے۔

انہوں نے بتایا کہ ہم آواز بلند کرتے رہے کہ بین الاقوامی افواج میں انخلاء بین الافغان مذاکرات میں پیش رفت کی مناسبت اور مطابقت سے ہونا چاہیے، افغانستان میں امن واستحکام میں پاکستان سے زیادہ کسی اور ملک کا مفاد نہیں ہے۔

ان کا کہنا تھا کہ افغانستان میں تنازعہ اور عدم استحکام کا جاری رہنا یقینی طورپر ہمارے مفاد میں نہیں ہے، افغانستان کی مجموعی تعمیر میں افغان معاشرے کے تمام طبقات کو ہم نہایت اہم سمجھتے ہیں۔

شاہ محمود قریشی کا مزید کہنا تھا کہ ہم نے تمام نسلی برادریوں کے ساتھ رابطہ کیا ہے تاکہ متحدہ اور پرامن افغانستان کے لیے اپنی حمایت کا اعادہ کرسکیں۔

انہوں نے کہا کہ موجودہ حالات میں ہم افغانستان میں اجتماعیت کے حامل نظام کے لیے حمایت جاری رکھے ہوئے ہیں کیونکہ یہی آگے بڑھنے کا واحد بہتر راستہ ہے۔

ان کا کہنا تھا کہ ’جیو اکنامکس‘ پر ہماری ازسرنو مرکوز کردہ توجہ کے پیش نظر ہم محسوس کرتے ہیں کہ ’خطے‘ کے جڑنے کے ثمرات اس وقت تک شرمندہ تعبیر نہیں ہوسکتے جب تک افغانستان میں پائیدار امن قائم نہیں ہوتا ہے۔

شاہ محمود قریشی کا یہ بھی کہنا تھا کہ اس مقصد کے حصول کے لیے عالمی برادری کے لیے نہایت اہم ہے کہ افغانستان سے روابط استوار رکھے۔

ان کا کہنا تھا کہ ہم سمجھتے ہیں کہ اس وقت سب سے بڑا موقع افغانستان میں پائیدار امن واستحکام کے لیے یکجا ہونے  کی صورت موجود ہے۔

انہوں نے کہا کہ میں نے تاجکستان، ازبکستان، ترکمانستان اور ایران کے دورے کئے جہاں میں نے ان ممالک کی قیادت سے  ہماری مشترکہ تشویش اور علاقائی انداز فکر اپنانے کی ضرورت پر تفصیلی بات کی ہے۔

ان کا مزید کہنا تھا کہ سلامتی، انسداد دہشت گردی اور سرحدی انتظام کے شعبوں میں ہمسایہ ممالک میں تعاون کو تیز کرنا تاکہ سمگلنگ، ہیومن ٹریفکنگ اور مہاجرین کے بہاو جیسے مسائل سے نمٹا جاسکے۔

انہوں نے بتایا کہ ہم آنے والے دنوں میں اپنے علاقائی انداز فکر کے لیے کاوشوں کو مزید تیز کرنے کا ارادہ رکھتے ہیں جس کے تحت اعلی سطح کے رابطوں کا سلسلہ آگے بڑھائیں گے۔

شاہ محمود قریشی نے یہ بھی کہا کہ چند گزارشات میں اس پہلو پر بھی کرنا چاہوں گا کہ ہم نے سفارتکاروں، عملے، بین الاقوامی تنظیموں کے نمائندوں، عالمی این جی اوز اور ذرائع ابلاغ کے افراد کے انخلاء کے لیے عالمی کوششوں میں بھرپور سہولت فراہم کی ہے۔

واضح رہے کہ انہوں نے یہ بھی بتایا کہ کابل میں پاکستانی سفارت خارجہ تیز ترین بنیادوں پر ویزے جاری کررہا ہے ، پاکستان کے انٹرنیشنل ہوائی اڈوں پر آمد ویزے جاری کیے جارہے ہیں۔